Dala ng krisis, kahit anong trabaho ay papatusin ng ating mga kababayan, mababa man at walang kasiguruhan ang kita.
Dumarami na ang mga nangangalkal ng basura. Sa sitwasyong ito, ang mas kumikita ay ang malalaking mga junk shop. Gayun pa man, kailangan nilang mamulot upang may makain.
Karamihan din sa ating kababayan ay paekstra-ekstra lang sa kung anumang pwedeng pasukan. Katulad ng isang mamang nanaglilinis ng bintana ng isa sa mga hotel sa lungsod ng Baguio. Pagkatapos niyang linisin ang mga bintanang ito, ano kayang susunod na pagkukunan niya ng ipapakain sa kanyang pamilya?
Itinulog naman na ng dalawang Metro Aide ang kanilang pagod sa parke. Kulang na nga ang kanilang sahod, wala pang katiyakan kung hanggang kailan sila mananitili sa kanilang trabaho.
Ilan lamang ito sa mga odd jobs kung tawagin na nagtatawid sa gutom sa mga maralitang tagalunsod. Hangga’t hindi tinutugunan ng pamahalaan ang kawalan ng disenteng hanap-buhay mananatiling lugmok sa kahirapan ang kalakhang bilang ng ating mga kababayan.

Photo by: Teroji Okubo, Marlon Gomarcho, & Joel Capulong