By JUDE BAGGO
www.nordis.net

Kakailian, gagayyem ken kapamilya, asidegen ti panagbobotos. Mano laengen nga aldaw ket mapan tayon kadagiti pagbotosan a presinto tapno botosan dagiti kayat tayo nga agbalin a lider tayo manipud lokal inggana nasyunal a takem. Addan kadi ti mapanpanunot tayo a botosan? Nakasagana tayon kadi? Adda kadi naisagana a listaan tayo? No awan pay, kasapulan tayo nga agpapunot ken agsagana. Narigaten no inton aldaw ti panagbobotos nga intayo ikamakam ti listaan tayo.

Ti umuna nga aramiden tayo ket kasapulan a bumotos tayo no May 9. Agawid tayo no kasapulan. Sayang ti botos. Daytoy laeng ti maysa nga aldaw iti Pilipinas nga adda ti bileg ti umili tapno agpili kadagiti agbalin a lider. Ngem siyempre, ammo tayo met a ti eleksyon ket saan nga isu ti pudno a mangsolbar iti nakaro a krisis ken problema tayo kas umili. Ngem uray man kastoy ket kas naibagak, gammatan tayo oportunidad ti eleksyon tapno suportaran dagiti maka-umili ken pudno nga agserbi kadatayo a kaadduan no isuda ket tumugaw iti poder.

Itatta a panagbobotos, mapadayawan ti umili a Pilipino ta adda dagiti sumagmamano a kandidato nga addaan iti napintas ken pagwadan a lider ken kandidato. Maysa ditoy ni Hon. Neri Colmenares, pudno nga isuna ket fighter ng bayan wenno mangilablaban iti karbengan ken pagsayaatan tayo nga umili. Ti track record na ket mangipakpakita nga isuna ket saan a napan iti kongreso kas kongresista ti Bayan Muna Party list tapno agpabaknang, saan a kas iti dadduma. Iti agarup siyam a tawen na iti kongreso, saanen a mabilang dagiti House Resolutions, Privilege Speeches ken dagiti naputar na a linlinteg nga isuna ti kangrunaan a nangilungalong. Kumpara kadagiti dadduma a peke a party list a sagpaminsan laeng nga umatendar iti sesyon ken awan man laeng ti naaramid da para iti kunkuna da nga ireprepresentar da iti kongreso.

Kas maysa a nainsigudan nga umili ken mangitantandudo para iti aglawlaw, karbengan tao ken pudno a panagdur-as, awisen kayo amin nga intayo pilien ken botosan ti maysa nga anak ti clerk ken security guard a nagbalin nga abugado inggana nga isuna ket nagbalin a representatibo ti Bayan Muna iti kongreso iti las-ud ti siyam a tawen. Adu ti naaramidan na kas kongresista, kas ti maysa a linteg a gandat na a mangingato iti pension dagiti SSS pensioners, text message iti panawen ti didigra, linteg iti reparasyon ken panangbigbig kadagiti biktima ti Martial Law ken dadduma pay.

Kayat tayo a maituloy dagitoy a nasasayaat a linteg nga agserbi iti kaaduan. Ngarud, agur-uray ti numero na iti balota para iti senador a 11 a magusugosan intono May 9. Awisen dakayo amin tapno botosan tayo ni Neri Colmenares para senador intono Mayo 9. Nalaka laeng ti aramiden tayo: gusugosan ti sukog a sinan-itlog nga adda iti batog ti numero 11. Isuna ti namnama ken boses tayo kas mannalon, mangngalap, babbai, ubbing, senior citizens, kabataan, migrante, drivers, ken dadduma pay a sektor nga ayan tayo. Ipan tayo isuna iti senado. #11NeriColmenares. # nordis.net