By JUDE BAGGO
www.nordis.net

Idi Pebrero 24, 2016, napuoran ti kampo wenno dormitorio dagiti Lumad a nagbakwit idiay Haran, Davao. Gapu iti puor, adda ti lima a katao a nasugatan mainayon ti maysa nga ubing. Napasamak ti puor bayat a matmaturog dagiti bakwit a kaadduan kadakuada ket napapanaw iti ilida a Kitaotao, Bukidnon gapu iti nakaro a militarisasion.

Napasamak ti panagpuor maysa nga aldaw sakbay ti pananglagip dagiti umili a Pilipino iti maika-30 nga anibersaryo ti EDSA I. Ti napasamak a panagpuor iti kampo wenno dormitorio ti agarup 500 a Lumad a nagbakwit manipud iti Haran ket mangipakita a saan pay a nasolbar ti tungtongan iti karbengan tao ken kappia.

Dagiti napasamak idi panawen ti Martial Law ket agtultuloy latta a mapaspasamak inggana itatta a panawen. Saan laeng a ti panagpuor no di ket ti mismo a rason no apay a pimmanaw dagiti Lumad kadagiti komunidadda. Saan aya nga idi panawen ti Martial Law ket adu ti napasamak nga ebakwasion ken pannakapapanaw dagiti umili gapu iti nakaro a militarisasion?

Kas kinuna dagiti biktima ken dagiti organisasion a mangitantandudo iti karbengan tao idiay Davao a ti panagpuor ket mapattapatta nga aramid ti soldado ken dagiti kameng ti Alamara, maysa a grupo a paramilitary idiay Mindanao. Isuda ket maus-usar kas goons dagiti dadakkel a kompania ti minas ken warlords.

Iti aniaman a panagbuya, saan a maiparbeng ti napasamak. Maysa pay, ti nakuna nga ebakwasion ket uneg ti maysa a simbaan. Kadagiti nangaramid, mabalin a maibagatayo nga awan pulos ti respetoda iti simbaan wenno awan butengda iti namarsua. Iti aniaman a kanito, saan a maiparbeng wenno maipalubos a dagiti nagbakwit ket madangran. Iti dadduma a pagsasao, dagiti nagbakwit ket maawagan nga internally displaced persons (IDPs), kayat a sawen, maikkanda koma iti proteksion ken masikaso ti kasasaadda. Saan a maiparbeng a gapu ta isuda ket nagbakwit ket awanandan iti karbengan ken proteksion manipud iti gobierno.

Saan laeng a tungtongan daytoy no ania ti pammatida iti biag, politika, kultura ken dadduma pay. Awanan karbengan ti sinnoman a mangdangran iti dadduma pay nga indibidual wenno grupo gapu iti pammatida. Ti tungtongan ditoy ket ti karbengan dagiti Lumad iti ansestral a kadagaanda.

Kas umili, husto laeng a kondenarentayo ti panagpuor iti kampo wenno dormitoryo dagiti Lumad a nagbakwit manipud Haran, Davao. Aramid daytoy ti awanan puso, Dios ken respeto iti karbengan tao.

Kas umili, suportarantayo dagiti kiddaw ken panawagan dagiti kakabsattayo a Lumad idiay Mindanao tapno maisardeng ti militarisasion kadagiti komunidadda ken kasta met ti pannakaisardeng dagiti dadakkel ken makadadael a proyekto kadagiti ansestral a dagada. Suportaran tayo dagiti Lumad. # nordis.net