Parabur: Pamedped iti bisin

4 MIN READ

Ni DONNA RABANG-PETA
www.nordis.net

Nasurok 1,300 a relief packs ti naipaay kadagiti nadidigra nga umili iti Cagayan gapu iti Bagyo a Ulysses. Malaksid kadagiti relief packs adda pay ti kinaban a bagas ken sumagmamano a sako ti luplupot. Daytoy a gannuat ket indauluan ti Redemptorist Amianan Response (RAR) babaen ti koordinasion kadagiti papadi iti Archdiocese of Tuguegarao nangruna iti Parokia ti San Jose Mangmangged ken Parokia ti St. Dominic de Guzman iti Baggao, Cagayan ken babaen met laeng ti pannakitinnulong iti Tulong Sulong Cagayan Valley ken dagiti miembro ti Baggao Farmers Association.

Panagrubbuat

Dua nga aldaw a naisagana dagiti relief packs. Bayat ti panagsagana kadagitoy a relief packs, naideklara ti intero a siudad ti Laoag, Ilocos Norte iti Modified Enhanced Community Quarantine (MECQ) gapu iti agdama a panagraira ti COVID-19. Saan a malapdan ti panagdanag dagiti misionero a papadi a Redemptorista, amangan no maitantan ken maladaw ti pannakaitulod dagitoy a relief packs gapu iti naiyetnag a MECQ.

Kaduak dagiti dua nga istaf ti Redemptorist Laoag, napankami nakisarita kadagiti opisyal ti barangay a makinsakop iti lugarmi tapno maideliver dagitoy relief packs idiay Cagayan. Iti damo a gundaway adda ti panagsarikedked dagiti opisyal ti barangay a mangited ti barangay certificate para iti pannakaibiahe dagitoy a relief packs  gaputa saanda pay a naawat dagiti annuroten ti MECQ nangruna mainaig iti panagbiahe, iti panagserrek ken panagruar dagiti residente iti Laoag City. Kinuna ti acting barangay captain a saanna a magarantiaan no mabalinkami a makaserrek iti Laoag inkaso a makaruarkami ket aggapukami pay iti sabali a probinsia.

Kinunak iti acting barangay captain nga ammomi met ti risgo ken no aniaman ti pagbanagan ti rumuar ken umuneg iti probinsia ket isiguradomi met a suruten dagiti pagannurotan wenno protocols kasilpo iti COVID 19. Innayonko pay nga insarita iti kapitan, kas misionero, mas ipangrunami a matulongan dagiti agkasapulan nangruna dagiti mabisbisnanen nga umili a biktima ti kalamidad idiay Cagayan, kumpara iti kasasaad iti sidong ti MECQ, mas nakarkaro ti kasasaad dagiti nadidigraan nga umili iti Cagayan gapu iti pannakalayusda malaksid iti sagsagabaen ti intero a pagilian a pandemia isu a saan a lapped ti MECQ tapno maitulod idiay Cagayan dagiti relief packs.

Numanpay kasta, nangited ngarud ti acting barangay captain ti pammalubos kadakami, kalpasan nga improsesomi dagiti kasapulan a papeles kas ti health certificate ken “travel authority” manipud iti Philippine National Police/Inter-Agency Task Force (PNP/IATF) Laoag.

Nobiembre 27, malem iti Biernes idi nagdalliasat ti wing van a naglaon kadagiti relief packs ken ti team ti RAR nagturong iti Baggao, Cagayan. Saan a lapped ti napigsa a tudo bayat ti panagdalliasatmi. Dimmanonkami iti parbangon ti Nobiembre 28 iti Parokia ti San Jose Mangmangged idiay San Jose, Baggao, dagusnakami a pinasangbay ni Msgr. Gerry Perez ken ni Fr. Dave Remudaro. Napalaus a panagyaman ti parokia ti San Jose gapu iti naipaay a tulong. Kinuna ni Rev. Fr. Rico John Bilangel, padi iti Redemptorist Laoag, numanpay saan a makaanay dagiti awitmi a relief packs para iti amin nga umili iti San Jose, ti napateg ket makaited bassit ti tulong para kadagiti tattao nga agkasapulan.

Bayat ti kaadda ti team idiay San Jose, pimmigsa manen ti tudo. Kinuna ni Msgr. Perez, “numanpay kayatmi koma pay ti makilangen kadakayo ken saanmi a karintaren dakayo a pumanaw ngem no pumigsa ti tudo ditoy ket amangan no saan kayo a makaruar ditoy gapu ta malapunos dagiti rangtay a pagdalliasatanyo.” Ngarud, iti kasdiay a kasasaad iti lugar ken nupay kayatmi pay koma a makatungtong dagiti lider dagiti organisasion ti mannalon saanmin a nauray isuda gaputa adda pay dagiti relief packs a mapanmi idanon iti Parokia iti sentro ti Baggao.

Iti dalan agturong iti sentro ti Baggao, dimmagaskami iti lugar a nakapasamakan ti “landslide” idiay Sitio Tueg, Barangay Bitag Grande, iti lugar a no sadino ket nagaburan ti maysa a pamilia gapu iti landslide. Nangipaay met laeng ti team iti sumagmamano a relief packs para iti kabagyan dagiti biktima.

Pamedped iti bisin

Kalpasan a naidiskarga dagiti dadduma a relief packs idiay San Jose ken gapu iti panagngato ti danum iti karayan a manglapunos kadagiti rangtay a pagdalliasatan, nagdardaraskami a napan iti Sentro ti Baggao tapno i-turn over dagiti nabatbati a relief packs iti Parokia ti St. Dominic. Ditoy a naam-ammo ken nakasaritami dagiti dadduma a kameng ti Baggao Farmers Association (BFA).

Kas pammilin kadagiti miembro ti BFA, kinunami kadakuada a saan a makaanay dagiti awitmi nga relief packs para iti amin nga umili iti Baggao, dagitoy ket pamedped laeng iti bisin bayat ti kalamidad nga impaay ti bagio. Impaganetgetko kadakuada, “numanpay bassit a bilang ti awitmi a relief packs, ti napateg ket naggapu dagitoy iti kaunggan ti puso dagiti nangidonar.”

Nagkaykaysaan ti Padi iti Parokia ti St. Dominic ken dagiti miembro ti BFA a pagtinnulonganda ti ag-validate ken biroken dagiti umno a pakaitedan dagiti relief packs – para kadagiti kangrunaan nga agkasapulan aglalo dagiti nakukurapay nga umili nga isuda dagiti bulnerable a sektor iti panawen ti kalamidad.

Naragsak nga inawat dagiti papadi ken dagiti kameng ti organisasion ti mannalon dagiti relief packs nga indanonmi kadakuada. Iti bangirna, mas naragragsak ti rikna ti team ti Redemptorist Amianan gapu iti naballigi a pannakaipay dagiti relief packs kadagiti tattao nga agkasapulan unay. Agas-bannog dagiti isem ken ragsak nga impakita dagiti tattao a naam-ammomi iti apagbiit a panawen nga inkam’ panangsarungkar kadakuada.

Nalaus met ti panagyaman ti Redemptorist Laoag Community kadagiti nagidonar nangruna dagiti deboto iti Baclaran Church idiay Parañaque City, dagiti indibidual a nangipatulod iti pinansia, dagiti kameng ti Confraternity of Our Mother of Perpetual Help Diocese of Laoag, dagiti kameng ti Delta Sigma XI Confraternity, dagiti miembro ti Alyansa dagiti Mannalon iti Ilocos Norte (AMIN) iti naanus a tulongda iti panawen iti repacking ken dagiti amin a nangipaay iti tulong iti daytoy a gannuat. DIOS TI AGNGINA! # nordis.net