Ni BRENDA S. DACPANO
www.nordis.net

THIRD OF FOUR PARTS

Ti panagluto kadagiti bukbukel ken grano (grains) ket nasayaat tapno mangted iti texture iti masida. Dagiti bukel ket nasayaat a paggapuan ti protina, fiber ken nababa ti fats-na. Ti bagas ken pasta ket adda iti kategorya ti ‘grains’, ken dua kadagiti kadawyan a maus-usar a ramen iti panaglutuan iti sangalubongan. Ad’toy ti sumagmamano a tarabay iti kusina.

Bukbukel. Photo by Brenda S. Dacpano

Klase ti bagas

Adda rinibu a klase ti bagas iti lubong. Adda ditoy ti kadawyan a tipo ti bagas ken suhestiyon iti pannakausarna.

Atiddog a grano. Addaan ti atiddog ken nakuttong a grano, nalag-an ken nalamuyot no naluto, nabanglo, ken agsisina latta dagiti grano uray no naluton. Ti long grain a bagas ket maibagay kadagiti luto a pilaf, biryani ken curry. Pagarigan: basmati, patna ken jasmine

Medium a grano. Masansan a mausar ti medium grain a bagas iti Asian cooking. Babbabassit ken naluklukneng no mayasping iti long grain a bagas, ngem dakdakkel ken saan a kas kalukneng ti bagas nga ababa ti granona. Nalukneng no kalutluto ngem medyo natangken nga agtetepkel no nakilabbanen.

Ababa a grano. Ababa ken nalukmeg a kasla nagbukel. Kadawyan a short grain rice ket adu ti linaon na nga starch isu nga agdedekket no maluto. Mayat nga usaren iti pudding, paella, risotto, arrozcaldo ken sushi. Pagarigan: aborio ken diket/glutinous rice.

Panagluto iti innapuy

Simple ken nalaka laeng ti agluto iti innapuy ngem adda dagiti agkidkiddaw no kasano ti agluto iti innapuy iti kardero. Agusar ti napuskol a kardero tapno saan a nalaka a makset ti innapuy. Arasawen ti bagas iti maminsan wenno mamindua (saan nga arasawen dagiti bagas a vitaminized wenno nalaokan iti bitamina kas dagiti magatang a commercial/fancy rice). Kadawyan dua a sukat a bagas iti maysa a sukat a danum ti timplana wenno rukoden ti naarasaw a bagas babaen ti panangtukod iti ramay, kas pagarigan, no maysa gerger ti ramay ti natukod a bagas, maysa gerger met ti ikabil a danumna. Isaang iti stove/dalikan iti kalalaingan na a pudot/apuy. No nagbureken, patayen ti apuy/stove, bay-an a maatianan santo isindi manen ti apuy iti nakapsot tapno malinaw. No agusar ti sungrod, bay-an a malinay iti uging.

Panagluto iti bukbukel

1. Tapno maliklikan ti gas iti tiyan gapu iti pannangan iti bukbukel, iyuper nga umuna dagiti bukel santo paik-ikan. Ikkan ti baro a danum a pangipaburekan.

2. Saan pay a timplaan iti asin wenno aniaman a naapgad ken naalsem tapno saan nga kumudiser ti bukbukel. Timplaan laeng iti asin no naluknengen dagiti bukel.

3. Idulin dagiti bukel iti addaan kalubna a garapon/pagikkan iti nalamiis, namaga ken saan a main-initan a lugar. No nasayaat ti pannakaidulinna, agpaut dagiti bukel. Ngem kamayatan no agingga laeng iti makatawen tapno saan pay nga agbaliw ti ramanna.

Tostado a garbanzos

Nabiit a lutuen, naraman ken nasustansiya a merienda. Ag-experiment kayo iti kumbinasyon nga spices nga ilaok iti panagaramid iti nadumaduma a raman. Mabalin nga idasar daytoy a napudot wenno nalamiis, ken mabalin nga idulin iti agingga dua a lawas iti nakaluban a garapon/pagikkan.

Ramen:

1 lata a garbanzos
2 kutsara olive/canola oil
1 kutsarita smoked paprika
1 kutsarita cumin a pulbos
Sangapirit a sili a pulbos
Sangapirit nga asin

Panangisagana:

1. Ipapudot ti oven iti 180°C.

2. Bugguan ken paik-ikan ti garbanzos.

3. Ilaok ti mantika ken spices iti garbanzos.

4. Ikabil iti baking tray ken iluto iti oven iti 25-35 minutos wenno aginggana tostado ken nasarangsang.

Panagluto iti pasta

1. Agusar iti dakkel a kaserola/kardero nga adu ti danumna.

2. Nayunan ti asin ti danum tapno adda raman ti pasta. Saan a laokan ti mantika tapno nalaka a kumapet ti aniaman a sarsa wenno timpla nga ilaok kalpasan iti pananglambong iti pasta.

3. Siguraduen nga agburburek ti danum sakbay nga ikabil ti pasta.

4. No naipisoken ti pasta, kaluban ti kaserola tapno agsubli nga agburek a dagus ti danum.

5. Kiwaren sagpaminsan ti pasta tapno saan nga agdedekket ken agpapada ti pannakalutona.
6. Lutuen ti pasta agingga ‘al dente’ wenno saan pay unay a naluto. Ramanan tapno masigurado.# nordis.net