4th Kongreso ti Binnadang naisayangkat
2 MIN READ
By BINNADANG-INNABUYOG
www.nordis.net
BONTOC, Mountain Province — Naballigi nga naisayangkat ti maika upat a kongreso ti Binnadang (Babbai Ipinget ti Nailian Naregta a Dangadang) idi Setyembre 16 – 17, 2015 idiay Longid’s Hall Diocesian Center, Chico Building, Poblacion Bontoc, Mountain Province. Dinar-ayan daytoy dagiti representatibo ti sektor ti kababaihan iti naduma duma nga barangay ken organisasyon ti babbai iti Montanyosa.
Daytoy maika uppat nga kongreso ket addaan iti tema nga “Paregtaen ti Tignayan ti Babbai iti Montanyosa para iti Panangsalaknib ken Panang ilaban ti Karbengan dagiti Babbai, Ubbing ken Umili.”
Iti keynote address ni Vernie Yocogan, Executive Director ti Cordillera Women’s Education Action Research Center (CWEARC) sinublian na ti nagrugian ti Binnadang. Kinuna na nga ti Binnadang ket nagtaud iti Montanyosa Women’s Federation (MWF) a nabukel idi tawen 1991. Naibangon daytoy kas markan ti kinatured ti babbai iti montanyosa a nangsupiat iti kinaranggas ti 702 brigade idi. Kinunana pay a saan nga malipatan ti nakaro nga harassment ken sistimatiko nga panangpatalna da kadagiti organisasyon ti umili. Ingiddan da pay ti panangarem kadagiti babbai, adu ti sinikugan da nga pinanawan da met lang.
Ditoy na nga inpunto ti kinatured ti babbai ti Montanyosa a nangitakder iti kinausto ken hustisya a nangsupyat iti kinaranggas ti militar, nangsalaknib iti daga, biag ken kinabaknang uray iti panawen nga nagturay ti buteng. Inpunto na metlang ti insuron dagiti aapo tayo kas kenda Mother Petra Macli-ing, Endena Cogasi nga “inayan” ti tumatalna iti panawen nga kasapulan nga agsao ken agtignay.
Isunga ti kayat a saowen ti tema ket “mas tumurtured tayo, umal-alibtak saan nga agpausar tapno pabangloen dagiti agtuturay wenno ukom. Agserbi tayo latta iti pudno nga pagsayaatan ti ili tayo ken ti kaaduan, agserbi tayo para iti panangpapigsa iti turay wenno bileg dagiti babbai babaen iti Binnadang ken dagiti miembro nga organisasyon na.”
Imbingay met lang ni Mila Singson, Chairperson ti Innabuyog ti madama a kasasaad ti pagilian ken ti partikular a kasasaad dagiti babbai iti rehiyon ti Kordillera. Ditoy a nakita nga agraira ti korupsiyon iti madama nga sistema ti gobyerno tayo. Makita daytoy kadagiti reaksyon ken saludsod dagiti dimmar-ay kas iti agtultuloy a panagpautang da iti Pilipinas ket adu met ti utang na ken saan da pay a makabayad. Ti mapmapanan ti pondo ti 4P’s, dakkel gayam ti pondo ngem bassit met ti dumandanun kadagiti beneficiaries ken iti tongtongan ti edukasyon, kurang wenno awan ti instructional materials kas iti manual kadagiti agisursuro iti sidong ti K12 program.
Paset met lang ti programa ti panangibingay iti naaramidan ti Binnadang manipud iti naudi nga assembliya na idi 2007 aginggana iti agdama. Ken ti panagbotos iti baro nga opisyales na.
Nangted met liwliwa dagiti kultural a presentasyon a naisaganan dagiti kabataan manipud iti League of Progressive Students – organisasyon dagiti kabataang estudante iti MPSPC, Bontoc Campus. # nordis.net
