2 MIN READ

Ni BRENDA S. DACPANO
www.nordis.net

Ti Tom Yum ket sopas manipud iti Laos ken Thailand. Popular daytoy iti Thai ken Malay cuisine. Maysa a naalseman iti salamagi ken natimplaan iti aramang a bugguong, patis, adu a sili ken malaokan ti getta. Kadawyan a maidasar a pampaganas iti pannangan (appetizer).

Ti resipi iti baba ket bersyon ti anak ko a ni Edgar, a nagboluntaryo a nagluto ken sipapannakkel a nangiparaman iti bukodna a luto.

Ramen ti Tom Yum sopas:

¼ kilo a pasayan, naukisan (ireserba ti ukis a pamparaman iti digo)
½ kilo a cream dory
¼ kilo togue
¼ kilo carrots
3 ungkay ti celery
Sili a sairo
4 kutsara a tom yum paste (adda magatang a naaramiden)
Getta ti 1 a niog
Mantika
1 sibuyas
3 a ngipen a bawang
patis ken paminta a pangtimpla

Ramen ti Tom Yum paste (3/4 tasa):

4 a bugas ti baraniw (lemon grass)
Sangatangan a laya
4 a ngipen a bawang
Sili a nagasang
½ tasa wansoy (coriander/cilantro)
2 kutsara a patis
1 kutsarita a bugguong aramang (shrimp paste)
1 kutsara nga asukar, brown
¼ tasa a tubbog ti salamagi (ilambong iti ¼-1/2 tasa a danum santo segsegen ken sagaten)
3 a bulong ti sibuyas (spring onions)
1 kutsara a mantika

Preparasyon iti Tom Yum paste:

1. Paglaoken amin a ramen santo iproseso iti food processor/blender wenno bayuen iti almires aginggana agbalin a paste.

Preparasyon iti Tom Yum sopas:

1. Ilambong iti bassit a danum dagiti ukis ken ulo ti pasayan sando segsegen. Ireserba ti tubbog na a pangtimpla wenno pamparaman ti sopas.

2. Igisa ti bawang ken sibuyas iti bassit a mantika. Ikabil ti 4 a kutsara a Tom Yum paste.

3. Ipisok dagiti carrots, celery ken sili.

4. Ikabil lti digo ti pasayan ken nayunan ti 4-5 tasa a danum. Pagbureken santo ipisok dagiti naiwa a dory, naukisan a pasayan ken togue.

5. Ikabil ti getta. Timplaan iti patis ken paminta.

6. Idasar a napudot. # nordis.net