Home > Op-ed | To bottom

Ringgor ti Jadewell, ipalpas

Makatitileng! Makaringgor! Makauma a dengdenggen ti isyu ti Jadewell. Manipud immay dayta a Jadewell Pay Parking, nagulo ti opisyales ti syudad ken dagiti umili. Tapno agkaykaysa dagiti opisyales ken umili, nasaysayaat a kitaen ti konseho no mabalin nga ipaima iti gobyerno ti syudad ti panakaipataray ti pay parking.

No amirisen tayo, ti nangpapintas ken nang-improve iti kalsada ti Baguio ket nagapu iti buwis dagiti umili, saan a maymaysa a tao. Ti saludsod…apay a pagbalinen a pagkwartaan ti maymaysa a tao? Ania ti inaramidna iti kalsada ti Baguio tapno isuna laeng ti agnumar? No agbirok iti pundo ti lokal a gobyerno ti syudad, ti mismo syudad ti mangipaabang kadagiti kalsada babaen ti panangimaton dagiti lokal nga opisyales. Mapan amin iti kaban ti syudad ti mabirokan ti pay parking ken adda maurnong a maaramat iti dadduma a proyekto. No kayat ti Jadewell nga ituloy ti pay parking a negosyona, agbirok iti abanganna a daga wenno gumatang iti pagpatakderanna iti maysa a pasdek a maaramat kas pay parking. Nalawag nga isuna ti aggastos, mangpaaramid ket rumbeng laeng nga abangan ti siasino a mapan agparada; saan a dagiti kalsada a ginastuan ti umili. Umad-ado ti tao ken lugan ditoy Baguio, saan a maawanan ti mapan agparada a lugan no agipatakder ti Jadewell iti aramidenna a pay parking. Tapno sumardeng ti isyu ti Jadewell, kitaen ngarud ti konseho ti panakawaswas ti katulagan wenno MOA iti nagbaetan ti lokal a gobyerno ken Jadewell.

Sigun kenni Mr. Delfin Balajadia, ti dadduma nga Jeepney Organizations ket agbaybayad iti Jadewell ti P300,000 iti kada tawen wenno P821.00 kada aldaw. Ti met maysa a jeepney organization ket agbaybayad iti P500.00 kada aldaw iti Jadewell. Dakkel koma daytoy a pundo para iti syudad no saan a naipaima iti Jadewell. Iti biang ti Jadewell, mait-ited kadi met laeng ti rumbeng para iti syudad? Saludsod laeng apo.

Idi awan ti Jadewell, awan ti riri; naurnos ti opisyales ken umili. Dagiti umili iti Baguio ket dida met kuna a madida iti pay parking, mayat tayo ta pagbirokan iti pundo ti lokal a gobyerno, ngem saan koma a maymaysa a tao ti agnumar ta saan met nga isu ti nang-improve kadagita a kalsada. Adalen ngarud koma ti konseho ti syudad ti aniaman a gakat wenno proyekto, ken singasing sakbay a pasingkedan ken ipatungpal ti napagtutongtongan tapno awan sabit wenno riri iti udina. #

Post your comments, reactions to this article

Home > Op-ed | Back to top