Kinakurapay, awan panggedan
Nagiduron kenni Ina
Umadayo makigasanggasat
Mapengdan kinarigat
Annak naipaidaman
Taripato ken dungngo
Dumayo agtrabaho
Iliw di inkankano
Inar-arapaap maipaayan
Narimat masakbayan
Maragpat kan makalpas da
Annak inay-ayatna
Ngem daksanggasat ni Ina
Nagtrabaho kas tagabo
Bisin, kinaranggas, abuso
Awan naited a sweldo
Milagro’t napasamak
Idi bimtak ti gubat
Panagawid nadaras
Nadangkok amo makaruk-at
Rigat nagpasaran
Napunas naminpinsan
Pamilya makita
Maarakup makadenna
No taliawen napalabas
Makaupay maawan ganas
Ngem di makalapped
Tapno tarigagay magupod
Dakkel adal naited na
Agannad iti sumaruno
Saan mapasubo
Agbalin manen tagabo
Panagdaliasat iti biag
Panagpursige di mapugsat
Kasapulan tured ken kired
Kinamatalek ken gaget
Ni Ina di naupay
Arapaap para annak
Ituloy makigasanggasat
Kinakurapay makaruk-at