Home > Op-ed | To bottom

Tongtong panggep ti minas

Kalpasan ti walo a bulan idi nabukel ti Save Apayao Peoples Organisasyon (SAPO), naangay ti umuna nga Assembly Meeting idi Pebrero 17-18 iti Conner, Apayao. Panggepna ti panangaramid iti Constitution and By-Laws ken panangplano kadagiti aktibidades ti organisasyon. Ngem gapu iti kiddaw dagiti umili, ti umuna nga aldaw ket pinagbalinda a mining forum. Ti maikadua nga aldaw ti naited para iti pakaseknan ti organisasyon.

Numanpay nagaramid dagiti lokal nga opisyales ti pamay-an tapno paayen dagiti apan makidar-ay iti mining forum ti SAPO, nabara latta ti panagsarabo dagiti umili. Kaaduan a barangay ket naibagi.

Naregta ti diskusyon manaig kadagiti isyu ti panagminas. Inbinsa-binsa dagiti nakidar-ay ti namnamaenda a benepisyo ken t masung-sungad a peggad nga iyeg ti panagminas. Napudot ti snnungbatan panggep iti benepisyo dagiti mangmangged-minas ken ti pamilyada nangruna iti SSS ken scholarshp nga ipanpanakkel ti minas nga ited.

Nagsao ni Ama Angdahan ket kunana: “Ti opisyales ti organisasyon ket isuda ti tulang, dagiti membro ti lasag. No awan urnos, agngoy-ngoyangoy ti organisasyon. Masapul a napigsa ken natibker ti takder ta ti kailalaan tayo ket: umuna, ti daga; maikadua, ti kabakiran ken ti aglawlaw; danum ken tao. Masapul a bantayan dagitoy, saan a dadaelen ta isu’t paggapuan ti pagbiagan. Apay umay ti kompanya ti minas nga agiwaras iti kwarta?”

Innayonna pay a no kunada a mangted iti trabaho, apay alaenda ti lakay nga agsaksakit ken nakapsut ti matana nga agtrabaho? Kunada pay nga agbalin kano a syudad ti Apayao. Apay bumaknang tayo kadi no agsyudad ti Apayao?

“Awisen tayo ketdi dagiti kakailian a makinayon, saan koma nga agbuteng; salakniban tayo ti ili tayo. Pabasolen datayo ti apoko no ipalubos tayo a dadaelenda ti ili,” nayon pay ti lakay.

Kuna met ti maysa a padi, “Pagtakderan tayo ti ‘Apayao Hymn’, pumigsa tayo tapno umad-adu pay ti mangnanam iti nakaparsuan kasta met ti sumarsaruno a henerasyon. Inted ti Dios daytoy napintas a lugar para kadatayo, datayo ti caretakers ket masapul nga aywanan, saan a dadaelen”.

“No panggep iti panag-adal,” ling-et, dara ken bannog ti maysa nga ama ti panag-adal ti anak, saan nga scholarship ti kompanya para kadagiti putot ti minero. Amin a nasyon a nangpasangbay iti minas ket nakukurapayda,” sungbat ti maysa pay.

Nakarit dagiti dimmar-ay iti forum. Nakitada babaen ti power point presentation ti epekto ti minas kadagiti umili. Naimatangan met dagiti dadduma a nag-exposure kadagiti komunidad a naminas ken agdama a maminminas ti nakaay-ay-ay a kasasaad dagiti umili.

Naregta ti diskusyon a rimmuaran ti adu a kapanunotan ken suggestions a nakaadawan dagiti naisurat a pagalagadan ti organisasyon ken programa ti aktibidades. Nanayonan pay ti myembro ti konseho.

Naregta ken nasaet ti organisasyon. Isuda ken ti umili ti nagparuar kadagiti amin a nausar iti Special Assembly Meeting babaen ti solicitation kadagiti naduma-duma a donasyon ken kontribusyon. Saanda a nagdependar iti dadduma kadagiti kasapulanda ngem impakitada a kabaelanda nga ibaklay babaen ti urnos ken panagkaykaysa. Sipapalubosda a nangidiaya iti balayda a pagturogan dagiti facilitators ken participants.

Dakkel ti pinaset ken tulong ti simbaan babaen ti venue, nagturogan ti dadduma a participants ken naglutuan. Sobra ti na-solicit a makan ken dadduma a nausar, adda pay impabalonda kadagiti facilitators.

Saludo kami kadagiti umili ti Apayao. Sapay koma ta agnanayon a napinget, naregta, naregget ken naurnos ti organisasyon ken umili nga agsiput kadagiti adda panagemda ken garamugam. Agridam.#

Post your comments, reactions to this article

Home > Op-ed | Back to top