Home > Op-ed | To bottom

Ayat

Kunada a ti Pebrero ket isu ti makuna a bulan ti ayat. Isu a rambakan ti sangalubongan ti Pebrero 14 kas naisangsangayan nga aldaw dagiti puso wenno St. Valentine’s Day, gapu iti maysa a martir...ni St. Valentine. Kaadduan a saludsod kadagiti babbalasang no dumanon daytoy nga aldaw ket “sino ti ka-valentinom”? Uray kadagiti babbaro ket agsisinnasaludsod da no sino ti Valentina ti kaduada. Ditoy met nga agitedda iti sagut iti tunggal maysa, uray dagiti agasawa. Mangipalagip idi agayan-ayatda pay laeng ken mangipakita nga agingga itatta ket di pay nagkupas dayta panagayatda iti tunggal maysa.

Kunada a no awan ti ayat ket awan ti tao, gaputa babaen ni ayat ket naparsua ti tao. Saan kano nga agbiag ti maysa a tao no awan ni ayat. Ni kano ayat ti sentro ti biag ket ti diro ni biag ket isu ti sam-it ni ayat.

No ngarud kasta, kumusta met ti ayat dagiti mangiturturay iti pagilian kadagiti iturayanda? Adda pay kadi natda nga uray sangkabassit laeng nga ayatda kadagiti umili? Masalusod daytoy gaputa iti mapaspasamak iti pagilian ken dagiti umili ket grabe a panakailumlom iti utang ken panagrigat. Iti benneg ti lokal ken nasyonal a gubyerno ket kasta la unay ti panagsisinnubangda. Di met sumardeng ti panagkurakot, kina-abusado dagiti adda iti turay, pammapatay kadagiti natured a mangdillaw ken mangibutaktak iti killo nga aramid, awan panangbigbig ken panangrespeto iti karbengan kas tao, ken ti kina-awan hustisya kadagiti nadangranan.

Awan met sarday a panangputar iti linteg a di makatao ken ti in-inut a panakailako ti amin a kinabaknang ti pagilian a mangpadisi kadagiti umili nga agindeg nangruna kadagiti lugar dagiti nainsigudan nga umili. In-inut a maag-agawan dagiti umili a Pilipino iti daga, pangkabiagan ken agbalinda metten nga iskwater iti mismo nga ili ken dagada.

Kunada a ni ayat ket ammona ti agsakripisyo. No ania ti adda kenka ket ipaay mo iti ay-ayaten, saan a naimot ken naagom ni ayat. Ania ngata no kasta met dagiti opisyales tayo? Isardengda koma ti agkurakot ket usarenda ti kwarta iti proyekto a mangpataud iti pagtrabahuan dagiti umili, kas koma iti maysa nga industriya nga agpartuat iti bukod tayo a ramit tapno saan nga amin a ramit tayo ket imported. Sitatallugod koma met ti BIR nga agkolekta iti buwis nga awan laokna a panagkupit ken awan mapaboran, baknang man dayta ket agbayad iti rebrebbengenna. Amin nga utang ket mabayadan no la ketdi napudno ti gobyerno ken ayatenna ti iturayanna. Isakitna ti umili a Pilipino ken ikagumaanna a lumung-aw ti pagilian iti gayung-gayong ni utang babaen iti pudno a panagserbi no adda ni ayat.

Ti imasna, inayat tayo dagiti impatugaw tayo iti turay babaen iti panangpili tayo kadakuada ngem ti supakpak ti ayat tayo kadakuada ket ti nalabes a panagayatda kadagiti bukodda nga interes, ti kapritsoda ken kina-agum, kaasi tayo a binaybay-an ken kinugtaranda. Saanda a binigbig dayta nga ayat tayo kadakuada gaputa agimbubukodan ti ayatda.

Cupido...kaano kadi a panaem ti puso dagiti mangiturturay iti pudno nga ayat tapno ayatenda ti pagilian ken umili a Pilipino? #

Post your comments, reactions to this article

Home > Op-ed | Back to top