Home > Op-ed | To bottom

Chacha ni GMA saan a kayat dagiti babbai

Iti maudi a paset ti 2005 tinukar manen ti rehimen US-Arroyo ti salada a ChaCha. Ti Charter Change ket riniing ken maniobra ti rehimen US-Arroyo tapno masalbar ti krisis ti a panagdaulo ni Arroyo. Ni Arroyo ti paborito ti US a nagpresidente ta isu ti pinaka-aso-aso kadagiti amin a nagpresidente ti pagilian. Importante unay ti ChaCha kadagitoy dua a presidente gapu iti panagsinnuportada iti war on terror. Ni US presidente Bush ti aw-awagan ti sanglubongan a numero uno a terorista. Makarimon met ti aweng ti ChaCha kadagiti traditional a pulitiko gapu iti “ no election”.

Ipaspasindayag ti rehimen US-Arroyo a ti ChaCha kano ket agturong iti panagbalbaliw ken reporma. Isu kano pay ti sungbat ti agdama a krisis ti pulitika ken ekonomya ken mapadur-as kano ti pagilian. Mangted ilusyon ken panaka-allilaw dagiti umili gaputa mangnamnamada a lumung-awda iti kinarigat. Ngem kadagiti militante ken progresibo nga umili, ti ChaCha ket maysa manen nga estratehiya dagiti imperialista ken agar-ari a dasig a mangpalamiis iti bumarbara ken umir-irteng a laban dagiti nakurapay a dasig.

Nabayagen nga ilaklako ti imperialista ken rehimen ti ChaCha. Kayatda a baliwan ti kontitusyon tapno maligalisa, maipauneg dagiti polisiya, programa ken masalakniban dagiti interesda babaen iti bersyon a reporma. Babaen daytoy a kinasikap, mapatibker pay ken maligalisa ti panagtagikua, panangusarda iti rekursos ken ti panagnaedda ditoy pagilian. Ti ChaCha ket dinesenyo ken mandar ti World Trade Organisazaition (WTO) gapu iti globalisasyon. Nalawag a ti ChaCha ket taktika ken palab-og ti US-rehimen Arroyo tapno nawaya a maipatungpal ti planoda.

Kuna ti Innabuyog a ti ChaCha ket kaipapanan ti awan sarday a saplit ken pananggundaway dagiti imperialista. Ikkatenna ti kakaisuna ken limitado a proteksyon tayo a nailanad iti konstitusyon iti benneg ti ekonomya ken patrimonya. Nabayagen a malablabsing ti konstitusyon babaen ti maka-imperialista ken anti-nasyunal a linlinteg ken programa. Pamuspusanda ti ChaCha tapno mapasardeng ti agtultuloy a protesta ti umili a Pilipino. Patibkeren pay ti ChaCha ti tulagan ti Visiting Forces Agreement (VFA), Mutual Logistic Support Agreement (MLSA) ken Mutual Defense Treaty ken ti BALIKATAN.

Kuna ti Gabriela a nakalawlawag a ti VFA ket protector dagiti Us soldiers nga abusado ken kriminal. Paneknekan ti agdama a kaso dagiti uppat (4) a soldado ti US a nangrames iti Pilipina idiay Subic. Saan a nai-serve ti Warrant of Arrest kadagiti perpetrators gapu iti sagudayen ti VFA. Kastoy ti inaramidda idiay Okinawa, Japan a nagapuanda. Maysa a saplit, dua a sugat ti nabayag a laklak-amentayo iti ima dagiti nadangkok nga Amerikano. Dangranda tayo la ngaruden, itarayan ken mai-yaw-awan ti kasoda. Isuda ti agbenipesyo kadagiti pinandayda a manglimlimo a katulagan. Nabayag koma a naaprobaran ti ChaCha no di ti napigsa a protesta dagiti militante ken progresibo a sektor. Karkaro malabusan iti dayaw ken karbengan dagiti babbai ken umili a Pilipino no maaprobaran ti ChaCha.

Nayon a kired ken pigsa koma ti dumanon kadagiti mamasirib, natutured ken lumablaban a babbai iti Kaigorotan ken umili a lumablaban kontra iti ChaCha tapno agtalinaed ti daeg ti patrimonya ken soberanya ti pagilian. Patapuaken ni Arroyo idiay Malakanyang. Iwagayway ti bandera ti balligi para iti nawaya nga umili ken ti pagilian. #

Post your comments, reactions to this article

Home > Op-ed | Back to top