Home > Op-ed | To bottom

Panagsango iti Baro a Tawen

Iti napalabas a tawen, tawen 2005…adu a krisis ti intay nagpasaran ken sinango. Adda krisis iti pinansya ti pagilian a nangitunda ti panaglagaw ti umili a Pilipino nangruna dagiti pulitiko, krisis iti ekonomya a nangpakaro iti panagrigat, ti awan sarday a panagngato ti presyo ti lana, panagngato’t presyo ti kangrunaan a gagatangen, krisis pampulitika, korapsyon, ti “hello Garci” wenno gloriagate scandal, impeachment, panangpapatay kadagiti aktibista, lider masa, jounalists ken church workers, ti baro a VAT law, ti ChaCha, ken dadduma pay a ganuat ti presidente a mangpakaro iti narigat la ngarud a kasasaad ti umili a Pilipino.

Dagitoy a krisis ket situtured tayo a nangsango ken impadanon kadagiti maseknan nga ahensya. Saan tayo a nagbaybay-a wenno nagulimek latta, gaputa sinanama tayo nga ikkan importansya ti gobyerno dagiti boses ti umili a mangkidkiddaw iti panagparbeng ken panagpabus-oy koma ti presidente; kas koma ti nayon iti sweldo dagiti mangmangged, tamingen ti adu a kaso ken nakalkaldaang a kasasaad dagiti OFWs ken mangpartuat iti panggedan tapno ma-alay-ayan ti nakapimpiman a kasasaad nangruna dagiti nakukurapay nga umili.

Ita a tawen a 2006, nakarkaro pay a panagrigat ti pakaisungalngalan ken masabet ti umili a Pilipino. Dadakkel a dalluyon ti lasaten bayat ti panagdaliasat daytoy a tawen. Iti kunada a ngumatngato ti balor ti piso ket temporaryo laeng, gaputa nakapsut ti buying power ti piso ken saan a masolbar babaen iti nayon a VAT. Saan met a ngumato ti sweldo. Kayatna a saoen, no pinairut ti sinturon iti napalabas a tawen, pair-iruten itatta, wenno ad-adu a biag ti makeltay gapu iti bisin wenno kinaawan maidasar a makan iti lamisaan, impataud ti kina-awan panggedan ken kinabassit unay ti sweldo. Nakaay-ay-ay a Pinoy!

Ngem no kasano a sinango dagiti isyu/problema idi napalabas a tawen, natibtibker koma itatta ti pakinakem ken naturtured a sumango ken lumaban. No pay nagsagaba iti adu a panakaparparigat, ranggas, panaka-umsi ken panakai-lupitlupit ti dayaw ken kinatao, ditay maupay. Aramaten dagitoy a kas kalasag ken silaw a mangiwaknit iti nangisit nga ulep a nangbalkot iti narimat nga agsapa. Pairtengen ti namnama a magun-od ti nabayagen nga arapaap a maaddaan iti padapada a karbengan, nawaya, nakapya, natalged ken nanam-ay a panagbiag. Napanday ken natenneb tayo kadagiti kapadasan iti nabayag a panakilaban. Ditay ngarud basta-basta talikudan ken sumuko. Dagiti napagballigian ket agserbi nga inspirasyon nga agtuloy ken agpursige.

Kabsat a nakaur-urat, napirsa-pirsay dagiti laslasag ken nawara-wara kadi dagiti tultulang mo? Urnongen, ken pagsisilpuem ida ket bumangon ka. Petpetam ti adal, kapadasan, simbeng ti kapanunotan ken galad ti kinataom, ta dagita ti armas mo a sumango iti naunday a panakidangadang para iti baro nga agsapa a tarabayen ti namnama, pammati, panagayat iti pagilian ken kakailian. #

Post your comments, reactions to this article

Home > Op-ed | Back to top