Home > Op-ed | To bottom

Pintas to away

Ti tao a dimmakkel iti syudad, kenkuana ket awan umartap iti pintas ti biag. Adda ti elektrisidad, uray agkurang ti danum, ken adu ti lugan. Nalaka a mapanka iti kayat mo a pagpasyaran, sementado ti dalan ken adu’t pagliwliwaan. Mayat ti panagbiag basta adda kwartam ken mabalin a kanen ken maramanan ti kunada nga agkakaimas a makan.

Iti syudad, makapulapol ti adu a tao. Dikay aga-ammo nga agka-kaarruba, awan pakibiangam no ania’t aramidenna wenno mapasamak kenkuana. Awan panagsisinnakit, komplikado ti itsura’t panagbiag. Awan ti di mabayadan wenno magatang. Iti syudad, awan madawat wenno agipadawat.

Iti panagbisita mi idiay Be-ew ket makaikawa. Agpayso, nagna kami iti innem nga oras ngem ti nakita ken kapadasan ket di magatadan. Nalinis ti danum, uray ti agayos iti pa-yas ket mainum; saan a masapul nga ipaburek. Ditoy kami a nagkarga iti danum a mainum bayat ti pannagnami. Nalinis ti angin a masay-up. Awan pagamkan iti polusyon. Simple ti biag iti away. No man awan elektrisidad, saan nga isu’t lapped tapno dagiti umili ket di da agu-ummong ken agpapatang iti sardam. Uray dagiti agtutubo ket naragsakda nga agkakanta ken aglulubi.

Ti taraon iti away ket kanayon a presko. No agluto iti masida, nateng, sida wenno karne dayta, asin ken bassit a mantika ti rikadona, ngem nananam ken naimas latta. Uray ti waig ken karayan ket nadalus, adu’t lamesna. Awan umartap iti biag iti away. Nalinis ken napintas ti aglawlaw, angin ken danum, ti taraon ket saan a nasabidongan iti pestisidyo.

Iti maysa a malem, inawis nakam dagiti agtutubo a mapan idiay burayok wenno waterfalls. Innem kami a nakikuyog kadagiti agtutubo. Nagna kami iti kabatuan. Agpayso met a sutil dagiti agtutubo, uray no adda koma medyo mayat a mabalin a pagnaan, ti pay laeng pagnaanda ket ti narigat a dalan. Buybuyaen dakami no kasano kami a magna iti dalan a nakairuamanda.

Kuna ti maysa, awatem, kitaem...baka maigalis; kitaem ta sumarsaruno kenka ket ni...uppat ti matana. Adda naigalis...nabasa, adda met ti madin a magna ket nagbati iti bangir ti burayok. Agpigpigerger dagiti saka ken tumeng dagiti dadduma. Ibirbirok mo’t pagkaptam ken pagdisuan ti sakam, numona ket nagalis ti bato idi nabasa gapu iti kina-adu ti saka a nagna. Agkakatawa dagiti agtutubo a mangbuybuya kadakami, nupay dida ipadlaw ngem agkikissiimda.

Iti burayok, nagdidigos dagiti agtutubo. Nalawa ti pagdigusan ken nalamiis ti danum. Kalpasan ti kagudua oras, napan kami iti bangir ti burayok. Adda gayam maysa pay a burayok iti saan nga adayo. Nalawlawa ti paglangoyan. Nagdidigos manen dagiti agtutubo. Talaga a nag-enjoy da, ngem saurda gaputa di da imbaga a mabalin ti agdigos tapno nagala kami met koma iti pagsuktan. Ti inaramid mi ket nagbuya laeng kadakuada nga aglalangoy. Sayang! dikam nakapaglangoy iti burayok.

Dagitoy natural a buya iti kaaw-awayan, kinasinged ti panaglalangen iti kaarruba, panagbibinningay iti makan wenno mula ken panagtitinnulong ket saan a mabirokan iti syudad. Dagitoy dagiti saguday wenno kababalin nga in-inut a mapukpukaw ngem kasapulan nga iriing. Saan koma a baybay-an, iwaksi ken lipatan.

Daytoy ti pintas ti away; simple a panagbiag, nalinis nga angin, danum ken nadalus ti aglawlaw. Iti syudad; moderno ken nadur-as kuno ngem narikut, matrapik ken napnuan polusyon. #

Home > Op-ed | Back to top