Home | To bottom

Hustisya para kenni Jane La Puebla!
Umno ken naikalintegan a pannakausig para kenni Guen Aguilar!

Ilocos Human Rights Advocates, SILAW, ken
STOP Exploitation

October 14, 2005

Dagiti overseas Filipino workers (OFW) wenno mangmangged a Pilipino iti ballasiw-taaw ti kangrunaan a mangbibiag ti ekonomya ti pagilian. Isuda ti kaaadduan ti ipaspastrek a dolyar iti pagilian kada tawen. Isu a saan a mapilaw a maaw-awaganda kas baro a bannuar.

Ngem iti laksid daytoy, adu a rigat, pannakagundaway ken sakripisyo ti mapaspasaran dagiti OFW manipud iti panag-aplay inggana ti mismon a panagtrabaho iti ballasiw-taaw. Gungundawayan isuda dagiti huklis a recruiter babaen ti nangato a placement fee ken dadduma pay a mabayadan. Adu pay ti baybayadanda iti gobyerno a saanda met amin a masagrap. Iti ballasiw-taaw, masansan nga atiddog ti oras ti panagtrabahoda ken nababa ti sweldoda. Adu dagiti saan a makatao ti pannakatratoda nangnangruna dagiti domestic helper (DH) wenno katulong. Kankanayon nga adda iti peggad ti kaadduan nga OFW.

Idi Septyembre 7, 2005, maysa a DM a taga-Bagabag, Nueva Vizcaya, a ni Jane La Puebla ti napapatay iti nakaam-ames a wagas idiay Singapore. Narang-rangkay ti bangkayna ket maysa-maysa a nabirukan dagiti nasina-sina a paset ti bagina iti dua a lugar ti Singapore. Kalpasan ti tallo nga aldaw, inarestar dagiti pannakabagi ti linteg ‘ti Singapore ni Guen Aguilar, taga-Tagudin, Ilocos Sur a suspetsada iti pannakapapatay ti gayyefmna a ni Jane. Maysa a lawas nga incommunicado (saan a mabalin a makasarita) ni Guen kalpasan a naarestar. Iti agdama, nakabalud ni Guen iti Changi Women’s Prison, ti pagbaludan a nakabitayan ni Flor Contemplacion idi 1995. (No malagip tayo, ni Flor ket napabasol a nangpapatay iti padana a DH a ni Delia Maga.)

Rumbeng a matunton ti hustisya para kenni Jane La Puebla. Masapul laeng nga agbayad ken madusa ti siasinoman a nangaramid ti nakaam-ames a krimen.

Rumbeng met a matulungan ni Guen Aguilar nangnangruna ta adda isuna ita iti nakaro a peggad no ibasar tayo ti napasamak kenni Flor Contemplacion idi 1995 ken ti saan a makatao a sistema ti hustisya ti Singapore. Karbengan ni Guen ti maikkan ti umno ken nainkalintegan a pannakausig. Masapul koma a maimatangan ti publiko daytoy a pannakausigna ken matratar isuna kas inosente aginggana a mapaneknean a nagbasol. Iti panagtaray ti kaso, masapul’ a maaddaan ni Guen ti addaan kabaelan nga abogado ken karbengan a makitungtong iti abogado kasangoanan iti aiiiaman a pannakaimbestiga, iti panawen ti pannakausig ken iti aniaman nga imporlante a kariito. Kasta met a kasapulan a maikkan koma ti gundaway ni Guen a mangdependar ti bagina ken agapela no kas pagarigan a saan a paborable ti desisyon ti korte.

Ti kangrunaan a makatulong a mangtunton ti hustisya para kenni Jane La Puebla ken ti panangilaban ti umno ken nainkalintegan a pannakausig ni Guen Aguilar iti agdama ket ti gobyerno ti Pilipinas numanpay addan panagliway ti gobyerno idi nagulimek daytoy idi ma-incommunicado ti niaysa a lawas ni Guen. Masapul koma nga ipinget ti gobyerno ti karbenganna a bisitaen ni Guen ken dadduma pay a Pilipino a nakabalud kas maiyannatop ti 1963 Vienna Convention on Consular Relations ken ipaayna ti ligal a tulong iti siasinoman a Pilipino nga adda asuntona iti ballasiw-taaw. Rumbeng pay nga ipakat ti gobyerno ti amin a kabaelanna tapno masalakniban ti karbengan dagiti OFW ta isuda ti mangpunpunno ti kaha daytoy. Saan koma a talikudan ti gobyerno dagitoy nga annungenna. Kasilpo daytoy, rumbeng met a kondenaren ti Singapore gapu iti saan a tnakatao a sistema ti hustisyana.

Adayo a mapasamak dagitoy a pakaisagsagmakan dagiti kakailian tayo iti ballasiw-taaw no adda panggedan ditoy Pilipinas. Ti kinarigat ti panagbiag iti kaaw-awayan gapu ti kinaawan ti pudtio a reporma iti daga ken ti nailian nga industryalisasyon a pinakaro pay ti pang-ekonomya a patakaran ti rehimen nga US-Arroyo a globalisasyon ti mangiduron ti naruay a kakailian tayo a mapan agbirok ti pangsilpo ti anges iti ballasiw-taaw. Dakkel ti sungsungbatan ti gobyerno no saanna nga asikasuen ti kaso da Jane ken Guen.

Hustisya para kadagiti amin nga OFW a biktima ti kinaranggas iti ballasiw-taaw!
Hustisya para kenni Jane! Umno ken nainkalintegan a pannakausig para kenni Guen!
Agbiag dagiti mangmangged a Pilipino iti ballasiw-taaw!

Home | Back to top