Home | To bottom

Ti pasamak a saan konto pulos a malipatan

Ni AZONE B. GUINEDEN

Dinmagse-dagsen ti riknak iti damag a nangngeg ko iti radyo dua a lawas ti napalabasen. Saan ko a pagarup a maysa kadagiti napapatay a naipadamag gapu iti napasamak idiay Buguias ket am-ammok… ni Antonio Licawen.

Maysa ni Anton kadagiti kadwami nga agtutubo idi a mangbukbukel iti cultural group ti nakurapay nga umili iti syudad ti Baguio. Kadwami a napan nagpalpalawag iti naduma-duma a pakaseknan ti umili babaen ti panagpabuya kadagiti komunidad ditoy Baguio, iti kaminasan ti Itogon ken il-ili ti Cordillera idi tawen 1987.

Apagbi-it ti nangkadwa-ak kenyana gaputa maysa isuna kadagiti dagus a nagpukaw. Nagpukawda gapu iti kinatured ken determinasyon nga agserbi iti nalawlawa ken nangatngato a tukad ti panagserbi iti umili. Natibker saan pulos a naupay isuna karkaro uray kadagiti panawen nga adda’t gapuanan ti timmamnayan dagiti dadduma a kakadwana.

Saludwek ken dayawek unay isuna iti kinatibker ken kinadeterminado na a nangitultuloy iti panggep na a mangsalaknib iti umili tapno agbiag a siwaya-waya ken maaddaan iti namnama nga agbiag a naballigi. Numanpay saanan a maramanan ti sam-it ti bunga ti inna-nagrigrigatan, ammok nga adu nga umili ti inbati na a mangituloy ken manglak-am to iti kinamayat ti aramid ken panggep na.

Maysa unay a saan ko pulos malipatan kenyana ket idi napan kami nagpabuya iti maysa a cultural night para iti panagkampanya idi ti Regional Autonomy ket tugut-tugot na ni ading na a nakipuypuyat piman kadakami. Agtawen laeng ti ading na idi ti tallo wenno uppat no saanak a agkamali. Saan a nagbalin a lapped ti nangipaawiran ni ina na kenyana iti ading na tapno saan nga umay a makipabuya kadakami. Saanakon a nasda-aw idi dinmakkel ken napanunutanen ni ading na ket maysa metten a nalaing nga artista ti umili.

Ni kadwa nga Anton ket nalaing nga ag-gitara, pasaray batingtingenna ti gitara sabayanna a kantaen ti ABAKADA, maysa kadagiti pabpaborito na a kankantaen idi. Numanpay saanna a nagun-od ti dadduma a mensahe ti kanta gapu ta saanen a nagtuloy nga nagadal iti burgis a pagadalan, pina-ado, pinalawa ken pinaun-uneg na ti kaamuanna babaen iti panaki-innadal ken naki-innadal isuna kadagiti umili, karkaro iti panang-arakop na ken panakipagbiag na iti umili a masa.

Kasasakit ti ipupusay ti kadwa nga Anton ken ti kadwa na gaputa natay da nga awan ti kalaban-laban. Agserbi ngarud koma daytoy a mangsindi iti rikna ken manglukat iti kapanunutan ti maysa ken maysa tapno riknaen ken adalen no apay nga adda dagitoy a mapaspasamak kas iti napasamak kenni kadwa nga Anton ken dagiti dadduma pay a kakadwa na a nang-isakripisyo ti biag da para laeng iti pagsayaatan ti kaaduan. #

Home | Back to top