Home | To bottom

Pablaak ti CWO-ISAC maipanggep iti agdama nga krisis politika iti pagilian

By Ilocos Sur-Abra Conference
Church Workers Organization

Ni Jesu-Cristo inkararag na iti Ama: “ Awanakon iti lubong, ngem addada (dagiti adalan) iti lubong. Intedko kadakuada ti saom ket pasantoem isuda iti kinapudno. Ta ti saom isu’t pudno”. (Juan 17:11, 14-19). Kinunana met kadagiti adalanna: “No agtalinaed kayo iti pannursuro, maammoanyo ti kinapudno, ket ti kinapudno wayawayaanna kayonto”. (Juan 8:32)

Ti kinapudno ti agdama a krisis ti politika iti pagilian ket inaldaw nga maiparparangarang kadagiti agtultuloy a paspasamak. Manipud iti limtuad a kontrobersiya iti panagsarita ti Presidente ken ti maysa a COMELEC Commissioner ken iti panangako ti presidente iti daytoy nga naaramid idi panawen ti Eleksyon 2004, naiparangarang iti panaglimlimona iti kina-awan ti nadalus ken nabaked nga pondasyon ti panangidaulona iti intero a pagilian. Nalawag unay daytoy a pananggulib iti panagtalek dagiti tattao ken umili nga iturayanna ket napukaw a naminpinsan ti moral a batayan (wenno “moral ascendancy”) ti panangidaulona iti kakaisuna a kristiano a pagilian iti daytoy a deppaar na iti Asia.

Dakami a trabahador ti Nagkaykaysa Nga Iglesia Iti Pilipinas (UCCP), nauneg nga pinagpanpanunotan ken inadalmi dagitoy a paspasamak ket babaen iti panangidalan ti Espirito Santo, nakarit ti rikna ken pammati mi nga ipaduyakyak ti karbengan mi a mangipablaak iti nagkaykaysa a kapanunotan mi a mangdillaw iti pannakasitak-sitak dagiti umili ken tattao nga nagramut iti saan nga umno nga aramid iti turay ni Gloria Macapagal-Arroyo.

Kas Iglesia nga mangitaktakder iti kinapudno ken Cristo, Idagadagmi ti pannaka-usig dagiti kontrobersiya a nangbalkot iti kangangatoan a tukad ti turay ti pagilian agraman ti pannakairaman ti pamilya ti Presidente kadagiti mapapati a panagkusit, panagkunniber ken pannakikumplot iti huweteng a naibutaktak iti Media sipud pay idi agtugaw ni GMA kas presidente iti pagilian.

Awan ti sabali a nadayaw nga addang ti agdama a presidente no di ti panagpanaw na iti puwesto ti kinapresidente tapno dagiti tattao ken umili nga ginulibanna iti talek ti agdesisyon iti pannakaidaulo ti pagilian nga agturong iti panagkaykaysa ken iti dalan ti pudno ken kappia tapno mapasubli ti talek iti naindemokrasyaan nga panagturay ti gobyerno iti pagilian.

Masapul a ti dalan ti kappia ken panagkaykaysa ket maiwayat babaen laeng iti pannakasungbat dagiti nauneg nga nagramutan ti problema ti pagilian nga mangpakpakaro iti panagrigrigat ti biag dagiti tattao ken umili a pakakitaan iti awan lapped na nga panagngato ti presio ti lana ken dagiti basaran nga gagatangen a kasapulan iti disente a panagbiag, pannakaipataw ti nayon a buis, ken ti sistematiko a korupsyon iti intero a tukad ti gobyerno.

Patien mi nga ti turay ti maysa a pagilian ket binendisyonan ti Dios no daytoy ket naisaad iti nadalus a pondasyon ken mangiyeg iti naan-anay a kappia ken sapasap a panagdur-as kadagiti tattao ken umili. Ngem ti nasaem a reyalidad ket awan ti nalawag a pakailasinan iti addang ti agdama a turay para iti daytoy a na-Diosan a gannuat.

Nagrud, awisen mi amin nga tattao ken umili, nangnangruna iti kameng ti UCCP iti Ilocos Sur-Abra Conference, nga agkararag ken agadal iti nauneg kadagitoy a paspasamak tapno ti Espirito Santo pagkaykaysaenna tayo iti pannakaidalan iti nalawag a takder iti panangitandudo iti kinapudno ken nadalus a panangidaulo iti turay ti pagilian.

Natakneng nga panagusig ti maipagna ngem nadayaw la unay ti addang nga panaglusulos ti presidente no ti talek ti tattao ken umili ket mapasubli. Ti Dios bendisyonanna tayo koma iti pannakarisot dagiti nailyan a problema!

* Pablaak ti CWO a napagkaykaysaan bayat iti Retreat /Recollection iti Bangued, Abra. June 18-20, 2005

Home | Back to top