Home | To bottom

Ti takder tayo mainaig iti panagstrike

By Lepanto Employees Union (LEU)

June 8, 2005

Idi petsa 2 ti Hunyo 2005, datayo a maingel a mangmangged ti Lepanto ket nangirugi ti welga kas kamaudian ken kapigsaan nga armas iti panangilaban para iti nainkalintegan a suweldo ken usto a karbengan.

Idi petsa 31 ti Mayo, nagiwaras ti kompanya ti pakdaar a mangibagbaga a naimpluwensiyaan wenno diniktaran datayo dagiti organisasyon ken tattao a naggapu iti sabali a luglugar. Adda da kano iti ig-igid ti Mankayan tapno makipartisipar iti strike.

Ti panagdesisyon ti panagwelga ket saan a nalaka gapu ta dakkel a sakripisyo ti kasapulan na daytoy. Saan met a kaskarina ti mang-impluwensiya wenno mangsugsog kunatayon a kas ibagbaga ti kompanya ti Lepanto. Datayo ti direkta a maap-apektaran iti nakaro unay a panagparigat iti uneg ti panggedan gapu ta datayo met laeng ti agsagaba iti anya man a pakataktakan ti panagtrabaho.

Nu intay lagipen idi nag-Strike Vote Referendum tayo nu kayat tayo a mapan iti strike wenno saan nu madi latta ti kompanya a mangited kadagiti dawat tayo a mangmangged, kaaduan ti immannugot. Saan kayo met a diniktaran ti kinumpurmi dita ta nagtaud dayta a desisyon manipud iti takder ken kapanunotan tayo (April 20 SVR result: 95% Yes to strike)

Madayaw tayo garud ta naiwayat tayo ti addang iti panangilaban ti karbengan tayo a saan laeng a para ti bagbagi tayo nu di pakairamanan a pagasayaatan ti pamilya tayo (Adi tako met bukbukodan nan gawis).

Laglagipen met ti kompanya nga isuda ti tagasabali a lugar nga iti panag-gamgam na kadagiti minerales ken dadduma pay a kinabaknangditoy ili tayo ket awan sabali nga inpaay na iti aglawlaw nu di dakkel a didigra a mang-apapektar kadagiti umili saan laeng a kadagiti ig-igid nu di intero a Mankayan ken kabangibang na a munisipyo ken probinsiya. Awan sabali nga inpaay na met kadagiti mangmangged nga agpayso a susuwelduan na ngem nakabasbassit nu ikumpara iti bukbkodan ti kompanya a ganansiya a nagling-etan tayo.

Datayo a mangmangged ti mangiparpartuat ti kinabaknang nga ag-aguman dagiti kapitalista. Saan tayo met a kalkalikaguman ti langit ken bulan, kayat tayo lang a mabiag ti disente isunga nga ti kidkiddawen tayo met ket ti usto ken nainkalintegan a suweldo ken benepisyo kasukat iti bannog ken rigat tayo iti uneg ti walo nga oras a panagtrabaho tayo a kas bag-en.

Awan met ti karbengan ti kompanya a mangibaga nga illegal ti strike nga ipagpagna tayo ta saan met nga isuna ti linteg.

Adu nga pammadakes ken pangbutbuteng ti araramiden ti kompanya tapno patalnaen na datayo a mangmangged nga mangilaban ti kalintegan tayo (saanen a mabuteng dagiti sigud a mabuteng ken mabisin). Saan laeng a dagiti opisyales ti UNYON ti makin-ammo ti kalintegan nu di ket amin a mangmangged ti Lepanto. Ti lang pinapel dagiti opisyales ti UNYON ket ipadanun da dagiti problema ken pangkasapulan dagiti miyembros da.

Ngarud, inrugi tayo ti laban ket itultuloy tayo daytoy agingana magun-od tayo ti balligi!

Napaneknekan tayo met nga adda ti madanon tayo iti panakilaban tayo idi naudi a panawelga tayo idi Pebrero 2003. Ditoy tayo a nakita a ti karbengan ket saan laeng a madawdawat nu di ket kasapulan nga ilaban ken itakderan daytoy!

Ilaban ti nainkalintegan ken resonable CBA!!!
Itandudo ti pudpudno, militante ken nailyan nga unyonismo!!!
Aabiag dagiti mangmangged ti Lepanto!!! #

Home | Back to top