Home > Op-ed | To bottom

Turismo ken ekonomya

Nalaka a pagalaan ti nayon a dolyar ti turismo. Daytoyen ti ususaren ti administrasyon ni Gloria a pangawis ti nayon a pagkwartaan dagiti il-ili.

Iti napalabas a bakasyon ket kunada a nagtrabaho ti gabinete ni Gloria. Daytoy ket nagpasyar kadagiti luglugar a ti pagarupna ket agawis pay ti turista.

Nagyan daytoy iti Mansion House, a kanayon a daydayuen dagiti taga-baba gapo iti naidumduma nga arkitekturana. Gaputa adda ni Gloria iti Mansion, adda ti naduma-duma nga atraksyon kas ti live band a nagharana iti sango ti Mansion idi Disyembre 31.

Bimmaba daytoy idiay La Union no sadino ket nag-surfing daytoy. Nayon nga agawis kano ti ganganaet a turista daytoy a surfing capital.

Iti Cordillera, napan ni Gloria iti Banaue, Hungduan ken Batad. Inuyawna dagiti moderno a disenyo ti balbalay a kunana a nangdadael ti buya ti rice terraces. Insingasingna a masuktan dagitoy no saan ket maiyalis dagiti tattao nga agnanaed iti ayan dagiti rice terraces.

Binisita na ti Kabayan nga ayan dagiti antigo a mummies ken ti Sagada nga ayan dagiti hanging coffins a kadaanan met laeng.

Sana imbaga a saan nga immay daytoy tapno agaramid ti resort hotels. Ti prayoridadna, kunana, ket ti panagaramid dagiti kalsada tapno makaumay dagiti turista.

Isunga ti farm-to-market roads iti Nangonogan ken Aguid, ket naiyaramid tapno maawis dagiti turista a mangbuya ti rice terraces iti Madongo ken Bangaan. Daytoy ti prayoridad ti administrasyon ni Gloria. Agyaman laengen dagiti mannalon a nairanod iti nasao a proyekto.

Daytoy Halsema Highway a nabayag a proyekto ket maysa a prayoridad ti gobyerno itatta. Saan a gaputa kayat ni Gloria a mabenepisyaran dagiti mannalon ken gardinero, nudiket tapno nalaka a makaumay dagiti turista iti Bontok ken Sagada, Mountain Province ken Kabayan ken dadduma a munisipyo ti Benguet.

Kayat ni Gloria a tuladen ti Espanya ken Malaysia a kunana a numero uno ti ekonomya gapo iti turismo, saan a dagiti lokal a produkto.

Parte ti panag-awis ni Gloria kadagiti turista, pinadasna a simpaen ti relasyonna iti masmidya. Isunga malpasna nga inikkan ti nasasakit a sao idi Nobyembre, daytoy ket kasla naamo a kuting idi Disyembre. Imbes a press conference ti insaganaanna, daytoy ket nangted ti maysa a dinner para iti media, malaksid pay a nakipulapol daytoy idi sakbay ti Baro a Tawen ken nakitugaw kadakuada iti maysa a restawran adiay Sagada.

Kayat a simpaen ni Gloria ti relasyonna iti masmidya. Ngem paset laeng daytoy iti kabuklan a planona a pabangluen ti administrasyonna.

No kayat ni Gloria ti mayat a publisidad, simpaenna ti panagited ti basic social services iti umili. Saan nga iti panagsao iti lengwahe a maawatan ti tattao ti pangkitaan ti sinsiridadna.

No kayat ni Gloria a simpaen ti relasyonna iti masmidya, isardengna’t panangpapatay kadagitoy ken i-orderna ti naan-anay nga imbestigasyon iti political killings saan laeng iti baet ti masmidya nudiket iti baet dagiti umili a nasken laeng a pagserbian ti presidente.

Dagitoy ti agrugian ti nadur-as nga ekonomya. Saan a babaen iti turismo. Ti masmidya ti agdokumentar kadagitoy. #

Post your comments, reactions to this article

Home > Op-ed | Back to top