Home > Op-ed | To bottom

Pag-ayusen ti esensya ti Paskua

Nasapa a nagriing dagiti ubbing. Dagusda a nilukatan ti maysa a dakkel a pagbalunan a napunno ti salad. Insagana ni Linda daytoy iti parbangon ta Christmas Party iti eskwela.

Nalaka nga isagana ti macaroni salad, kunana. Pinalukneng na’t macaroni sana inikkatan ti danum. Niluktan na’t lata ti kondensada, all-purpose cream, ken fruit cocktail. Inlaokna amin dagitoy iti ayan ti macaroni. Inikkan na’t nalabaga ken berde a gulaman nga inna inluto iti rabii. Addan ti kontribusyon ti ubingna iti party.

Apaglukat ti maysa nga ubing, nagtilmon daytoy. Saanna a maramanan ti inluto ni Linda a salad. Napudot pay daytoy ngem saan a didyay ti rason. Daytoy ket naisagana para kadagiti kaklase ti manongna idiay elementarya.

Sakbay a pinmanaw ti apan maki-party, nilukatanna manen ti salad. Nagibati ti maysa a platito para keadagiti adingna.

Sagpaminsan laeng nga agluto ni Linda ti kastoy. Awan ti oras, kunana. Agpayso nga ngan-ngani awan ti oras na ta pasaray adda isuna iti palengke nga aglaklako kadagiti umay a turista.

No awan isuna iti palengke ket agsursursor kadagiti aggangantsilyo no saan ket kadagiti agar-aramid ti bonnet ken tsaliko. Agurnos pay daytoy ti sinulid nga inna ipa-abel kas ules.

“Ngem, malaksid iti oras ket saan met a kanayon nga adda’t kuwarta ti tao,” kunana. Mamati akon kenni Linda ta kanayonna a riri ti awan ti mabatbati malpas nga agbayad daytoy ti abang ti puwesto. “Bassit pay ti gumatang, nayonna pay.

Maminsan iti kada tawen nga agawit ti makan dagiti ubbing iti eskuwela. Maminsan kada tawen a manglibre dagitoy. Ket mailibreda met nayonna pay.

Malaksid iti makan, nagpabungon daytoy ti agbalor P50 a regalo para iti exchange gifts. “Nagrigat ti agpili ti agbalor ti singkwenta,” ririna. Masapol kano nga eksakto tapno awan ti agriri. Masuruan pay dagiti ubbing nga ag-budget, kuna kano ti maestro. Masapol ngarud a napudno dagiti ubbing ken nagannak tapno awan ti saur.

Imbag pay dagiti ubbing ta masapada a maadal ti panagbibinningay ken ti kinapudno. Inton dumadakkelda, sapay koma ta maisuroda ti esensya ti agited para iti kaarruba nga uray awan ti sukatna.

Ti esensya met ti Paskua ket ti panag-ayos ti anyaman nga adda. Kasla iti waig nga agayos dagiti makunkuna a grasya. Ti nangted ket maikkan, ti naikkan ket mangted met laeng. Kasla koma waig nga awan ti patingga nga agay-ayos ti panag-ayat iti pada a tao.

Biruken tayo daytoy a panag-ayat ken grasya ket baybay-an tayo nga agayos babaen iti panag-aramid ti nasayaat inggana ti pudpudno a panagbaliw ti gimong ket magun-od tayo.

Nasayaat a paskua kadayo amin! Sapay koma ta nakaradkad kay latta.#

Home > Op-ed | Back to top