Home > Op-ed | To bottom

Nakurapay a Paskua

Nagrugi manen ti Disyembre, kaarruba ket nasayaat koma daytoy ta dandanin a Paskua manen. Idi naminsan nga aldaw ket nagparada manen dagiti ubbing a mangpalagip ti maysa a naragsak a Paskua.

Ngem ti saludsud ko, agtultuloy latta met dagiti pangta ti kumarkaro a panagrigat ti biag kadagiti kaaduan nga umili, kasano aya a paragsaken manen ti Paskua dagiti nakurapay?

Idi namingsan a lawas, ti presyo ti LPG ket P475 laeng kadagiti komunidad. Ngem daytoy ket nginmato iti nasurok a P600, kuna ti maysa nga agnanaed iti Irisan dumpsite. No apay met a nagassideg ti lugarda iti warehouse ti LPG ngem nakanginngina met latta.

Ti expanded value added tax ti kuna dagiti kaarrubak a ti gapuanan ti panagngato ti ado a magatang. Uray pay mamin-ano nga ipalawag dagiti representantibo ti maseknan nga ahensya ti gobyerno a saan nga amin a magatang ket ngumato iti pannakaimplementar ti EVAT, awan latta’t mamati gaputa amin met a magatang ket nagrugin a ngumina.

Kaspagarigan, kaarruba, uray saan koma a ngumina ti nateng, itlog, karne ken dadduma pay a produkto nga agrikultural, ngimmato met ti presyo ti abono, pestisidyo ken feeds gapo kano iti EVAT. Pati ti presyo ti lana a nausar a mangmanupaktura kadagitoy ket ngumato. Isunga ti suma-total, uray dagiti saan koma a direkta a mapatawan ti EVAT ket ngumina met laeng.

Kitaen tayo nga uray dagiti price tag kadagiti sidewalk ket nabaliwan. Dagiti baratilyo a medyas a sigud a P10 ket tallo’t P50 wenno P20 ti maysa itatta. Ti Chinese ponkan a sigud a P5 ti maysa ket P6.

Maawatan tayo dagiti sidewalk vendors no agpangatoda ti presyo ta anya ngay ti pangalaan da’t inayonda iti igatang da’t dadduma a kasapulanda no ado kadagitoy ket nangina itatta.

Narigat nga agpayso ti kabibiag itatta, kuna ti maysa a karpintero a sidewalk vendor ti baketna. Saan a makutkuti ti lako ta nangina. Bassit ti gumatang, kunana.

Uray dagiti babassit a negosyante ti sida ket marigatanda. Idi ket maysa a dyip a sadiwa ti maipaibus iti agmalem, kuna ti maysa. Itatta, uray lima a banyera ket agparigat a maibus. Awan sa met ti kuwarta ti tattao, kunana.

Bayat a dagiti opisyales ti syudad ket agpampanunot no kasano nga umado ti turista iti syudad, marikna dagiti drayber, sidewalk vendors, mangmangged ken mala-proletaryo ti rigat ti panagbiag iti syudad.

“Agawid kamin iti ili,” kuna ti maysa. Mayat ta adda pay ti remedyo idiay, kunana.

Ay ina, aya! Nauma ni Linda nga agpampanunot no kasanona a lutuen ti sayote a pamigat, pangaldaw ken pangmalem ti pamilyana. Awanen ti panawenna a panunuten ti para iti Paskua.

Pito nga aldaw iti kada lawas nga agal-ala daytoy ti sayote kadagiti ig-igid ti bantay. Ilakona ti dadduma ta panggatang ti sabon ken bagas. Sayote laengen ti libre iti syudad ti Baguio, kunana. #

Home > Op-ed | Back to top