Home > Op-ed | To bottom

Kararwa ti panagparigat

Sabali ti pagsagsaganaan dagiti umili itatta, kaarruba. Apay kunam nga inruar ni Maestro Sebio ti tallo a tangke ti LPG na? Ken apay nga inaldaw nga adda iti grocery ni Manong Mero a minero?

Saan nga agpayso nga agisagsagana da’t pangluto ken iluto para iti aldaw dagiti kararwa. Kadawyan ket no kastoy nga asidegen ti kararwa, naisaganan ti ado a niyog, diket, pansit ken naduma-duma a mainom. Sigud a dua nga aldaw a pagu-urnungan ti tattao ti aldaw ti kararwa.

Napintas koma nga agpayso ti agbakasyon itatta ta atiddog ti bakasyon dagiti eskwela ken agtrabtrabaho iti publiko ken pribado nga opisina.

Ngem kaarruba, daytoy nangiruaran ni Maestro Sebio kadagiti naidulin a tangkena ket tapno makagatangen ti ad-ado nga LPG sakbay a ngumato manen daytoy. Uray dagiti grocery ket ngumato kano babaen iti Expanded Value Added Tax wenno E-VAT. Nagdesisyon ti Korte Suprema a legal ti E-VAT, ket maimplementar ti pannakaingato ti VAT manipud 10% ngumato iti 12%. Ken adda dagiti sigud nga awan ti VAT a mainayon a maikkan ti buwis.

Isu gayam nga uray kas-kasano ket nag-urnungen ti asukal ken kape ni Manong Mero a minero.

“Narigat ti umentra iti usok a saan pay a nagkape,” kunana.

Imbag kadakuada ta adda ti paggatang da’t ad-ado ngem dagiti kadawyan ngaya kumma ni Linda sakbayna a ngalngalen ti mummana. Saanen daytoy a nagtimek ket apagdarikmat nga intuprana’t nalabaga iti tengnga ti nalipit a pagnaan.

“Puay!,” kunana. Awan met kano’t naglakuanna ti pigad ken hot-pads isunga awan ti ipanna idiay dakkel a mall. “Uray mano nga aldaw a sale, awan met laeng ti paggatang,” kunana a makalidliday.

Inton Nobyembre 1, aldaw ti kararwa a maimplementar ti E-VAT.

Apay kano ngay a ngimmatu-ngato metten ti presyo ti LPG sakbay pay ti aldaw tio kararwa? Maigapo daytoy iti panagngato ti presyo ti gasolina ken lana iti sangalubongan a ngan-ngani dinomingo a ngumatngato.

“Por dios, por santo, saan pay a naiyulog ti E-VAT ket nangato aminen a magatang. Kasanonto pay aya no addan dayta nga E-VAT?” saludsod ti kaarubak a paralitiko. Agdardarumudom daytoy nga immadayo iti store ni Sabel, malpas na nga alaen ti dua a supot ti instant noodles nga isu kano’t almusalda nga agi-ina.

Saan a maapektaran ti noodles, kuna ni Sabel. Ngem kasano ngay ket saan met a puro noodles ken sardinas ti kanen ti tattao?

Ay ina, aya! Awan ti malagip ti tao a pagsayaatan no kanayon a kastoy ti tongtongan kadagiti store iti komunidad. Uray kunam nga agala kan ti sayote ta isu’t nagkaiwara, ag-high blood ka latta iti kanayon a panangidasar ti sayote ken ti agtultuloy a nguminaan dagiti makan. #

Home > Op-ed | Back to top