Home > Op-ed | To bottom

Bulk water saan a dumanon

Masapol nga adalen a nalaing daytoy proyekto a bulk water, kaarruba!

Malaksid iti presyo a ngumato ti ngan-ngani mamintallo a daras, ken ti kunada dagiti tattao a nasabidungan ken saan a nadalos ti danum nga ilako ti Benguet Corporation (BC) iti Baguio Water District (BWD), daytoy a danum ket saan pay a sigurado a dumanon kadagiti balbalay ti nakurapay nga umili iti syudad ti Baguio. Saan a nakasagana ti BWD a mangted ti danum iti amin nga umili ti syudad.

Iti maysa a public hearing iti city hall, kuna ti chairperson ti BWD Board pf Directors a ni Atty. Antonio Espiritu nga uray anya nga oras a kayat ti residente ti Baguio nga ag-shower ket adda ti danum a rumuar. Saanak pay a mamati a kastoy ti mapasamak. Iti panagsasau ni Apo Abogado, para kadagiti adda’t kabaelanna ti nasau a danum. Ngem saan a daytoy ti sentral a tongtongan.

Ti misrno a BWD ken BC ti nangkuna a ti danum a magapo iti Itogon ket maipan iti Ambiong no sadinno ket adda’t dakkel a tangke a mangtengngel iti nasurok 50,000 kubiko-metriko a danum. Daytoy a lugar, kunada, ket nababbaba ngem ti dadduma pay a luglugar kas iti Quezon Hill, ken San Carlos Heights.

Kayatna a sawen, kaarruba, ti nasurok-kumurang a kakatlo iti kabuklan nga agnanaed ti syudad ket saan a madanon ti bulk water project, malaksid a naynayunan ti BWD ti tangkeria. Ti Irisan a nakairdmanan ti San Carlos Heights ket kunada a nabaknang iti danum. Daytoy ti papagyanari ti ado a babassit nga empleyado iti priibado ken publiko nga opisina, dagiti aglaklakd iti palengke, drayber ti taxi ken dyip, ken dadduma pay a mangriiangged kadagiti babassit a restaurant ken hotel. Maysa kadagiti kabaknangan ti populasyon ti Irisan, ken kabaknangan met ti botante iti Baguio.

No saan a dumanon ti danum iti Irisan, dakkel a porsyento ti populasyon ti Baguio ti saan a maserbisyuan. Itatta ket awan uray maysa a balay iti San Carlos Heights ti serserbisyuan ti BWD. Nasurok a maysa a tawen a naiwayat dagiti tubo ngem awan ti danum inggana itatta sunga dagiti umili sadiay ket agtaytaya ti tudo ken aggatgatang ti danum kadagiti trak.

Kuna ti BWD nga agbirok pay daytoy ti pundo para iti rehabilitasyon ti pasilidadna para iti distribusyon ti danum. Kasla saanda a seryoso nga ikkan ti naan-anay nga atensyon daytoy. Nagkari ti BC idi napalabas a tawen nga isunan ti mangituloy iti saan a nalpas a repiping ti BWD ken ti Local Water Utilities Administration. Ti mismo a presidente ken charman of the board a ni Philip Romualdez ti mismo a nangisawang iti kastoy a kari, idi panawen a ti kontrata ti bulk water ket pinaay ti damo a pre-qualification bids aand awards committee ti BWD. Daytoy ti argumento nga inusar ti BC, malaksid nga inbutaktakna dagiti ma-anomalya a transaksvon ti BWD ken LWUA idi.

No matuloy a ti BC ti mang-asikaso kadagiti nagkurangan ti BWD ken LWUA ti repiping ken distribusyon a pasilidad, saan aya nga addang dagitoy iti maysa a sumungsungad a pribatisasyon ti publiko a pasilidad? Anya ngay koma ti interes ti BC iti negosyo ti danum? Aglako laeng kano daytoy. Kontrata ti suplay ti danum laeng kano daytoy.

Ay kunak a ket tapno makalako ti BC ti danum kadagiti umili ti Baguio, aramiden na’t amin a kabaelanna tapno matuloy daytoy. Saan a kaskama nga agbusbos ti BC t dakkel a kantdad no awan ti namnamaenna a dakdakkel a ganansya. Saan a nengneng daytoy.

Ngem nasirsirib ti umili, karkaro iti sango ti maysa nga ulbod a kumpanya.#

Home > Op-ed | Back to top