Home > Op-ed | To bottom

Cellcard kas prayoridad

Nalidayak a nangdengngeg a kasla saan nga ammo ti sumagmamano nga opisyales tayo ti masapolda a paggastuan. Pagtungtungtungan dagiti kameng ti Sangguniang Panlalawigan ti Benguet idi napalabas a lawas ti annual performance budget nga insubmitar ti lokal a gobyerno ti Buguias. Nalatak iti nasau a badyet a numanpay naladaw a naisumitar daytoy, nag-comply latta daytoy iti Local Government Code of 1991.

Nasdaaw laeng dagiti board member ti Benguet iti maysa nga item a nakakitaan ti pananglabsing iti Administrative Order No. 103s. 2004. No siak a maysa, kasla madi a prayoridad ti Buguias nga iti cellcard a magasto ti 4.31% ti kabuklan a badyetna a P37,450,113.

Agasem, kaaruba a P1,613,600 ti naibadyet tapno laeng igatang ti cellcard dagiti opisina ti Buguias. Kuna ti report ti review committee a ngan-ngani P3,600 a binulan ti nakabadyet para iti cellcard ti maysa a departamento iti Buguias. Violation daytoy iti maysa nga administrative order ti probinsya, kuna dagiti mamanday ti linteg.

Nangaton sa unay daytoy, kunada. Ngem no siak a maysa, ikumparak daytoy a gatad iti dadduma pay a paggastuan ti Buguias kas koma iti badyet na iti kalamidad (5% ti kabuklan nga income wenno P1,872,505.65) kas nailanad iti RA 8185. Ti badyet para iti cellcard ket ngan-ngani agpada iti badyet para iti kalamidad. Ngem no amirisen a nalaing, ti kalamidad koma ti inikkan da’t prayoridad karkaro ta ti munisipyo ti Buguias ket maysa kadagiti kanayon a madaldalapos ti bagyo.

Mayat ta kinorektar ti SP Committee on Finance and Appropriations ti badyet para iti sweldo ti sumagmamano nga empleyado ti munisipyo, isunga kaaduan kadakuada ket ngumato ti suweldoda. Kasta met a nakorektar ti naduma-duma nga appropriations kas nailanad iti nasau a report. Numanpay adda dagiti naibadyet a nangat-ngato ngem ti awtorisado a kantidad, mayat ta nakita daytoy dagiti board members.

Sadino aya ti pakakitaan dagiti prayoridad dagiti lokal a yunit ti gobyerno tayo no saan nga iti tinnawen a badyetda. Kadagitoy a makita no anya ti pampanunuten a pangipanan ti gobyerno kadagiti kwarta a maaw-awatda.

Agpayso nga masapol ti kabiitan a linya ti komunikasyon karkaro kadagiti lugar kas iti Buguias. Saan metten nga uso ti landline ken ti walkie talkie isunga cellphone ti kangrunaan a maus-usar itatta. No amin nga empleyado ket maikkan ti cellcard, bassit daytoy a badyet iti maysa a tawen.

Ngem daytoy ket mangguyod pay ti nayon a gasto dagiti empleyado. No saan nga umanay ti load, inkapilitan a gumastos para maka-txt bak pay.

Mano aya a tattao ti kastoyen nga agpanunot itatta? Un-unaenda pay dagiti makuna a luxury expenditures ngem kadagiti kasapulan unay.

Daytoy ti klase ti prayoridad nga inyeg dagiti ganganaet a kumpanya iti benneg ti telecommunications nga isuda ti agnamnamnama a makalako ti ado a cellphone ken cell card. Datayo met, uray nadadael ti badyet tayo, kasla awan ti panunot tayo a naisaltek iti maysa a pangkasapulan a saan tayo koma a masapol.

Makipustaak a saan laeng a ti Buguias ti adda’t dakkel a badyet na para iti cell card. #

Home > Op-ed | Back to top