Home > Op-ed | To bottom

Por fabor, ipangruna yo ti umili

Anya ti mangidurduron iti Board of Directors ti Baguio Water District (BWD-BOD) tapno inda manen ikkan ti konsiderasyon ti Bulk Water Supply Project (BWSP) ti Benguet Corporation (BC)?

Napaneknekandan idi mitingda idi Mayo a maitantan pay ti panangiyawat ti kontrata iti BC-BWSP gaputa ado pay nga isyu ti masapol a sungbatan.

Iti maysa a surat ni Mayor Braulio D. Yaranon iti BWD-BOD, inbinsa-binsana dagiti pakaseknan ti umili ti Baguio ken ti ili ti Itogon. Ammo tayon a narugit ti danum nga iyeg ti BC-BWSP gaputa daytoy ket maipundo iti Antamok open pit mine. Ammo tayo met nga agkurkurang ti danum ti umili ti Itogon isunga kwestyunarenda ti prayoridad a mapanan ti danumda. Adda pay ti legal impediments a naduktalan ni Mayor Yaranon kas iti rekisito ken permit para iti nasau a proyekto ken ti pannaka-approve ti local a gobyerno ti Benguet ken ti Itogon kas nailanand iti Republic Act No. 7160. Dagitoy ti nalawag a rason no apay saan a naiyawat iti BC ti kontrata.

Nalawag met nga awan pay ti pangkitaan a naiyaramid ti BWD ti maysa a tangke o reservoir ti danum a makalaon ti 50,000 cubic meters nga isu ti pangikabilan ti magapo iti Itogon. Kasta met nga awan pay ti naisayangkat a konstruksyon para iti maysa a koneksyon manipud iti dakkel a tangke a mapan kadagiti 16 a babassit pay a tangke. Karkaro nga awan pay ti naisayangkat a repiping.

Maysa pay a konsiderasyon ket ti panangisayangkat ti maysa a public hearing para iti panagngato ti presyo ti danum a saan pay a naiyaramid. Ti presyo ti BC-BWSP ket P39.99. Ti agdama a presyo ti BWD ket P21.08. Dakkel a diprensyanto daytoy no aglakonto ti BWD iti magapo iti BC-BWSP. Inayon pay ti ganansya ti BWD, nasurokto kano a P60.00 per kubiko- metriko ti danum iti Baguio. Saanto a kabaelan dagiti umili ti Baguio ti presyo ti danum ket agtayanto iti tudo ti kaaduan. Daytoy ti maysa a sakit ti ulo ti BWD. Kasano na a bayadan ti 50,000 kubiko-metriko nga inaldaw no awanto ti agpakunekta ti danum?

Ngem ti dakdakkel a pakaseknan ket ti projected production ti drilling ti BWD a 65,000 kubiko-metriko nga inaldaw. Sobra daytoy a kantidad ti danum iti inaldaw a pangkasapulan nga umabot laeng iti 50,000 kubiko-metriko para iti 350,000 a populasyon ti Baguio. Daytoy ti ayan ti dakkel a saludsod, kaarruba. Kasano a gumatang ti BWD ket nasurok met gayam ti inna maiparpartuat a danum? Dagitoy ti danag ni GM Teresita de Guzman, itatta.

Adda pay ti saan a nasungbatan ti BC kadagiti umili ti Itogon mainaig iti panangalana ti karbengan iti danum a sigud nga us-usaren dagiti umili sadiay. Isngsingirda pay dagiti dagdaga ken pagtaudan ti danum a sigud a dinadael ti minas a saanna pay a nasungbatan.

Ket no kitaen a nalaing, anya pay koma ti rason a maiyawat ti kontrata ti BC-BWSP? Apay nga aggaganat manen dagiti maseknan nga opisyales ti BWD karkaro ti BOD na daytoy? Nangngegak, kaarruba, nga adda’t maysa a gundaway a napan ti kameng ti BC idiay BOD meeting ket ipilpilitna nga iyawatdan ti kontrata. No agpayso daytoy, kaarruba, kasla adda’t maang-angot dagiti konsyumer a madi kadagiti proseso ti bids and awards. Apay kano nga adda’t tured-nakem ti BC a mangsingir iti BWD-BOD no awan ti intednan a pabor?

Sapay koma ta saanda manen nga inlako ti interes ti publiko kasukat ti mano laeng a milyones a mapan iti bulsa ti manmano. Sapay koma ta ipangruna dagiti maseknan ti pagsayaatan ti ad-ado.

Siak a maysa, saanak a gumatang ti danum a nasabidungan. Saanak a mangbayad ti danum a nasakit ti nakemko. Agurayak laengen ti tudo ta malaksid a libre daytoy, nadaldalos ken nasaysayaat ti riknak a mangusar ditoy. #

Home > Op-ed | Back to top