Home > Op-ed | To bottom

Kasukat ni GMA, masapol nga ilaban

Ay Ina, aya? Apay a nakaad-ado a sector ti agdawdawat a bumaba iti puwestona ni Pres. Gloria Macapagal-Arroyo? Nabayag met a dawat ti umili a mabang-aran koma ti tattao kadagiti naduma-duma a pakaseknan.

No kadagiti umili iti syudad, daytoy ket iti kina-awan ti naan-anay nga oportunidad iti pagteggedan. Inayon pay dita ti kanayon a peggad iti demolisyon kadagiti pagtaengan.

Kadagiti umili a mannalon kadagiti kaaw-awayan, ti nakaro a rigatda gapo iti saan nga umno a relasyonda kadagiti dadakkel nga appo’t daga ken ti kinakurang ti daga a matalon ket pinakaro pay ti kaadda dagiti soldados ti gobyerno. Dagitoy a soldados ti mangriribok iti kappia ken talna kadagiti komunidad.

Inayon pay a nakaro ti rigat iti intero a pagilyan gapo iti krisis iti ekonomya. Ti panagngato ti presyo ti gasolina ket nangi-iyeg ti saan a malapdan a panagngato ti presyo ti ado a gagatangen.

“Nabayag met nga adda dagita a sitwasyon,” kuna ni Sabel, diay kaarubak a nanglukat ti store na ta isu pay kano a makabanni-it ti piso-piso. “Ngem apay nga itatta laeng a dawaten a bumaba ni GMA? Uray met iti panawen ni Marcos, Cory, Ramos ken Erap ket adda dagita a rigat?,” saludsod ni Sabel.

Kunana a saan laeng nga itatta a dumawdawat dagiti minero ti nayon a suweldo. Ken saan laeng nga itatta nga agpegpeggad a maawanan ti trabaho ti ado nga empleyados ti gobyerno.

No amirisen a naun-uneg, ket agpayso ti kuna ni Sabel. Uray sino a Presidente iti napalabas ket nakaro ti krisis iti ekonomya ken politika, ken awan ti naan-anay a serbisyo-publiko. Ti panang-adal ko, uray iti panawen dagiti nagturay sakbay kenni Marcos ket naduma-duma a tukad ti krisis ti nasagrap dagiti umili a Pilipino.

Kuna dagiti social analysts a ti krisis ket naisuksok iti sistema ti panagturay dagiti agar-ari a dasig ti appo’t-daga ken burgis-komprador. Dagitoy ti kakumplot ti Estados Unidos tapno patalinaeden ti panag-iggem ti ganganaet iti tay-ek ti ekonomya ken politika iti pagilyan.

Ket kunada a no ti problema tayo ket adda iti sistema, saan koma a tao ti ikkaten tayo, nudiket ti sistema ti baliwan! Anya ti kayatna a sawen daytoy, kaarruba?

No siak a maysa, agpayso nga awan ti naitedna a panagbalbaliw ti dua a daras a panagpatakyas iti poder ti dua a presidente. Daytoy maikatlo a panagpababa iti pangulo ket mangted koma ti naan-anay a panagbalbaliw iti gobyerno tayo. Ta no intay kitaen, sinuktan tayo ni Marcos ket naipatugaw ni Cory a padana a naggapo kadagiti mananggundaway a dasig. Idi inikkat tayo ni Erap gapo iti iskandalo nga inbutaktak ni Chavit Singson ti Ilocos, padana met laeng ni Gloria Macapagal-Arroyo a corrupt, asu-aso ni George Bush ken Estados Unidos, ken awan ti nagnam-ayan ti ado a tattao iti panagturayna.

Naadaw tayon dagiti adal iti namindua a daras a panagpatalaw tayo iti presidente. Saan koma a maysa manen a mananggundaway, abusado ken asu-aso a presidente ti ipatugaw tayo. Awan kadagiti agngayngayangay ti makunak a mabalin nga ipatugaw, ta no ni Bise-presidente a Noli de Castro, kadua ni Gloria daytoy a nagsaur iti eleksyon. No ni Senate President Drilon, saan a matalek a kayana ti agidaulo gaputa agbalbaliw ti desisyonna.

Maysa pay, no aggapo met laeng iti parehas a dasig ti sumukat, awan pulos ti namnama dagiti babassit nga umili. Agpadada laeng a mangidur-duron ti interes dagiti dadakkel a negosyo ken ganganaet nga amoda. Ilukatda met laeng ti pagilyan iti ganganaet a pananggamgam ken control. Agpapadada nga awan ti aramidenda para iti pagnam-ayan ti kabibiag ti orninaryo a tao.

“Kasano ngay dayta,” saludsod ti maysa a baket iti dyip. “Impatugaw yo ni Gloria, ket itatta kayat yo manen nga ikkaten, sino ngay ti isukat yo?”

Kaarruba, adda ti ibagbagada a transition council. Daytoy ti mangisagana ti pannakaipatugaw ti presidente nga agpayso a pinili dagiti tattao. Daytoy met ti mangidalan iti pannakasukat ti Commission on Elections a direkta a kinontrol ni Gloria idi napalabas nga eleksyon.

Ngem daytoy a transition council ket saan koma a buklen manen dagiti political elite a dakkel ti pakinabangda iti agdama a sistema. Dagiti naduma-duma a sektor ti nasken a mangbukel ti transition council. Aggapo kadagiti magungundawayan a mangmangged ken mannalon, dagiti sektor ti babbai, agtutubo, nailyan a minorya, propesyunal ken tao’t-simbaan ken dagiti nailyan a negosyante ti namnamaen tayo a mangibagi iti interes dagiti agdama a magungundawayan ken maidadanes a sektor ti gimong tayo.

Ti saludsod manen, “Palubusan ngata dagiti tradisyonal a politiko ti kastoy a sistema?”

Masapol nga ilaban daytoy. #

Home > Op-ed | Back to top