Home > Op-ed | To bottom

Mayat ta immay a nasapa ti tudo

No agpili ak ti panawen iti uneg ti maysa a tawen, daytoy panagtutudo ti kaykayat ko. Uray kuna ti dadduma a nakalidliday no umay daytoy a panawen, siak a maysa ket maayatan nga agpayso.

Libre manen ti danum kadagiti adu a nakurapay a pagtaengan iti syudad. Immay ti tudo a nasapa ket nagrugin a maurnong ti danum kadagiti dram ken tangke. Adunto ti pagdalos dagiti alikamen ken uray ti mulmula ket inaldaw a taraknen ti tudo.

Daytoy ti maysa a banag a kaykayat ko iti panagtutudo, kaarruba, saan a natapok kadagiti kalsada. Asuk laengen ti lugan ti madi a maangot iti panagdaliasat nga inaldaw kadagiti kalsada a pinalipit dagiti nakaad-adu a luglugan.

Maay-ayatanak a mangkita nga agrusing dagiti mulmula. Agrugi nga agbalin a berde dagiti bantay ken uray anya a bukel a nakadisu iti daga ket ag-ungar a kasla adda’t nangriing iti nabayag a pannakaturogda.

Saanak nga ipokrita nga agibaga a madik ti napitak ken madik met laeng a mabasa ti bado ken sapatos kada rumuarak. Saanak met a, naragsak no saan a mamagaan dagrti abadata awan ti init. Ngem mabalinak a saan a rumuar inton napigsa’t tudo, ta adu pay ti mabalin nga aramiden iti uneg ti balay uray agtud-tudo.

Daytoy a panawen a malagip ko a simpaen dagiti ramramit a nabayag a nabaybay-an. Daytoy met ti panawen a mabalin nga agbuya ti programa iti TV a saan a maikkan a panawen kadagiti aldaw a maymayat ti rumuar.

Daytoy ti panawen a madalusan dagiti kanal ken ti aglikmot. Maiyanod dagiti rugit a nabayag a saan a naikkat. Maugasan dagiti bulbulong ti mula ken maikkat dagiti grasa kadagiti pader ken kaykayo.

Natamiis ti angin a kasla awan ti rugitna. Nakasalsalun-at ti ag-anges ken mayat ti magmagna kalpasan ti tudo.

Maumong a masapa dagiti miyembro ti pamilya. Inton awan ti silaw, adda’t gundaway nga agginnistorya ket adda pay tsansa nga agkanta bayat nga adda’t agtukar ti gitara. agay-ayam ti domino wenno sungka. Dagitoy nga ay-ayam ket sinuktan ti adu a computer-based games a para iti maymaysa nga agay-ayam.

Mairuar dagiti bota, payong, kapote ken daan a pantalon ken sweater. Uray dagiti daan nga ules ket mairuar, Dagiti napuskol a sako ket mausar a pigadan ken uray pay dagiti lupot a nadadael ket mairuar a pagpunas ti anyaman a masapol a mamagaan.

Awan ti dadduma pay a panawen a naragragsakak ngem ti panagtutudo. #

Home > Op-ed | Back to top