Home > Op-ed | To bottom

Multa kadagiti gumatang iti sidewalk

Kasano ngata, daytoy, kaarruba, nu maaprubaran ti singasing a mamulta ti siasinuman a gumatang kadagiti sidewalk vendors iti syudad tayo?

Saan laeng a dagiti aglaklako ti kamatento dagiti kameng ti Public Order and Safety Division (POSD), nudiket uray pay dagiti apan gumatang kadakuada ket makamat met laeng. Agpada met laeng nga agbayad dagiti matiliw ti P500, kas iti ibaybayad dagiti aglaklako a matiltilwan ti lakoda.

Uray kasano ti ikastak a mangtaros nu apay a nalagip ni Councilor Pinky Rondez a multaen dagiti gumatang. Kunana nga iligal kano ti aglako kadagiti kalsada isunga tapno awan ti aglako, masapol a mamulta dagiti gumatang. Ta nu awan ti gumatang, awanto ti aglako.

“Kasdiay?” saludsod dagiti kakaarubak a kadawyan a gumatgatang kadagiti sidewalk.

No siak a maysa, a nganngani awan ti oras nga ag-grocery, iti sidewalk ti kadawyan a pagal-alaak ti ado a kasapulak. Sida, nateng, medyas, payong… Adda pay ti prutas, bado, tsinelas, sapatos, ken dadduma pay. Amin a kasapulam iti inaldaw-aldaw ket adda iti sidewalk. Saan nga agpayso a nalaka dagiti gagatangen iti sidewalk ta napadasak nga inkumpara ti presyo dagitoy kadagiti magatang iti dadakkel a paggatangan. Ngem ap-apanak latta iti sidewalk gaputa mabiit laeng ti agpalengke kadagiti kalsada. Saanen a masapol nga umuneg iti grocery store ken awanen ti agpila iti cash register. Mabalin ka pay a tumawar ken makigayem iti aglaklako. Human touch, kunada… mabalin pay ti maki-innistorya no magasatan ka pay.

Kayat nga ipakaawat ni Rondez a ti panaglako kadagiti kalsada ket iligal. Kinunana pay nga “unfair commercial competition” daytoy kadagiti negosyante nga agbaybayad ti buwis, abang ti puwesto, mayor’s permit ken dadduma pay a bayadan tapno makaala ti lisensya nga aglako. Kinunana pay a kayatna a patalinaeden a nadalus ket nadalimanek ti syudad isunga kayatna a dagiti “ligal a negosyante” laeng ti paggatangan dagiti tattao.

“Kasdiay?” saludsod manen dagiti kakaarrubak nga aglaklako ti prutas kadagiti kalsada.

Maawatak dagiti kakaarrubak nga aglaklako kadagiti sidewalk. Kunada nga agbaybayadda met laeng ti buwisda. Iti kada aldaw ket agbaybayad dagiti sidewalk vendors ti kurtais a P5. Iti uneg ti makabulan ket 150 daytoy. No inaldaw nga aglako ti maysa a vendor ket agbaybayad daytoy iti city hall ti P1,825 iti uneg ti maysa a tawen. Dakkel a buwis daytoy a magapo kadagiti vendors.

Imbes a lapdan dagiti konsehal dagiti sidewalk vendors, istimarenda laengen koma ti koleksyon ti buwis ta no kwentaenda ket mabalin nga ad-adda a dakdakkel ti makolekta ti syudad kadagiti sidewalk vendors. Iti immaduan dagiti sidewalk vendors iti naduma-duma a kalye ken overpass iti syudad, mayat a kitaen laengen no kasano dagitoy nga agbalin a natalged a puwersa para iti panagpatalinaed a nadalus ken nadalimanek ti syudad.

Kunada nga agkaraiwara dagitoy kadagiti kalye, ngem no maikkan isuda ti mayat a puwesto, agbalin pay a nasimpa dagiti paglakuan dagitoy. Makatulongda pay nga agdalus ken agpasilaw kadagiti narugit ken nasipnget a kalsada ti syudad.

Ta no agpayso a maawatan dagiti konsehal tayo ti kasasaad a narigat ti kabibiag dagiti sidewalk vendors, makitada koma no kasano a karkaro nga agrigat dagitoy inton maparitan a gumatang ti publiko kadakuada.

Kasdiay! #

Home > Op-ed | Back to top