Home > Op-ed | To bottom

Panagsagana

Naurnong iti maysa nga okasyon ti naduma-duma nga ahensya ti gobyerno iti rehyon a Cordillera idi Miyerkoles. Ti inda nagtutungtongan a nakasango dagiti kameng ti masmidya ket nu kasano dagitoy nga agsagana iti umayan dagiti emergency.

Kas namnamaen, adda iti nasau a taripnong ti pulis, bombero, ti sektor ti transportasyon, dagiti enhinyero ti public highways, ken naduma-duma pay. Ngem ti kaskasdaaw, awan dagiti nars, doktor, ken dadduma pay a kameng dagiti ospital. Uray dagiti kameng ti Social Welfare ken ti Red Cross ket awan sadiay. Iti laksidda, adu ti nagapo iti sektor ti turismo.

Kasla ti naipangruna ketdi idiay a taripnong ket ti pagimbagan dagiti turista. Nagtungtongan ti kasasaad dagiti kalsada a sumnag-at (ken agpababa, siyempre), ti kasasaad dagiti luglugan, ken nu kasano a nakasagana ti naduma-duma nga ahensya.

Ibagbaga ni Dir. Mariano Alquiza, ti regional director ti Department of Public Works and Highways (DPWH) a saan a napeggad dagiti kalsada. Ti kunana, iti kinaado ti luglugan a lumablabas kadagiti kalsada, manmano met ti madisdisgrasya. Kunana nga adda pay ti nasurok 10 road warning iti napasamakan ti aksidente idi napalabas a lawas. Ngem, kaarruba, uray mano dagiti pakdaar kadagiti parte ti highway a napeggad, napeggad latta dagitoy. Saan a kissayan dagiti pablaak ti peggad nu saan a naannad dagiti agmanmaneho.

Kinuwestyonar dagiti opisyales ti kasasaad dagiti luglugan, isunga insingasingda ti periodic inspection kadagiti luglugan ken ti regular a panangisayangkat ti seminar kadagiti drivers ken conductors ti bus. Innayonda pay ti First Aid Training kadagitoy. Kunak manen, kaarruba, nu ngay natay met laeng dagitoy iti aksidente, sino ti agisayangkat ti first aid kadagiti pasahero a saan a matay gapu kadagiti aksidente.

Ti awan a pulos iti tungtongan ket nu kasano a sanguen dagiti maseknan dagiti peggad kadagiti pagtaengan dagiti umili mismo nga agnanaed kadagiti napepeggad a luglugar. Saan met a natongtong dagiti peggad dagiti makaakar a sakit kas iti meningococcemia, TB, typhoid fever, dengue ket dadduma pay. Kaykayat ko met koma a pagtongtongan ti kasasaad dagiti umili nga agnanaed iti asideg ti basuraan iti Irisan ta dagitoy ti mangsagsagrap ti nakaro a peggad gapo iti mapupuuran a rugrugit.

Nakasentro dagiti tongtongan kadagiti umayan ti ado a tattao iti rehyon, nangnangruna kadagiti destinasyon ti turista.

Kaspagarigan, ti Office of the Civil Defense (OCD) ket agsagsagana para iti maysa nga exposition para inton June 11-12. Iti daytoy a pabuya ket ipakita na ti naduma-duma laing dagiti naduma-duma nga establiyemento kas iti panagpaksyat t apoy, ken dadduma pay.

Nailanad met nga adda ti Forum on Emergency Preparedness and Safety ken clean-up drive kas paset ti programa sakbay ti June 12. Ti saludsod manen ditoy ket nu apay a ni Senator Richard Gordon ti maysa kadagiti agsau iti nasau a forum. Ken, kaarruba, tumulong kano ni Apo Gordon nga agdalus iti syudad ti Baguio ta isu kano ti expertise na.

Ala man ngarud, kaarruba ta kitaen tayo ti taga-Olongapo nga umay agdalus iti Baguio… Saan na manen nga ibaga a patalawenna dagiti balbalay a manglinglinged iti buya dagiti sabsabong ken bantay ti syudad tayo! #

Home > Op-ed | Back to top