Home > Op-ed | To bottom

Iyasideg tayo ti 4th Estate iti tao

“Anya kano ti bullshit ken salbag, Nanang?” saludsod ti maysa nga ubing iti nanang na. Agdengdengngeg daytoy iti radyo ket di na maawatan dagitoy a naisawang ti maysa nga host iti maysa a programa.

Naawatak ti bullshit ngem ti salbag ket awan pulos ti ammok. Ti ammok, dagitoy a sau ket saan a nasken nga ikabil iti pagiwarnak karkaro kadagiti programa ti brodkast kas iti telebisyon ken radyo ta saan a makontrol ti brodkaster nu siasinno ti agdengdengngeg.

Uray kadagiti nataengan ket narigat a saan a planado ti linaon ti maysa a programa iti radyo wenno iti TV. Saan a basta laeng pumarang ti maysa a grupo ti announcers/broadcasters iti programada a saanda a nakasagana. Ta saan nga amin a panawen ket ti plinanoda ti mapasamak iti ere.

Ti maysa a programa iti radyo, kas pagarigan, ket dakkel a gundaway koma kadagiti tattao nga agpalawag ken malawagan kadagiti naduma-duma a pakaseknan. Mayat ta adda ti kakastoy a tsansa ti naduma-duma a sektor tapno agdengngeg wenno agbuya kadagiti kameng ti masmidya nga agpalawag.

Uray dagiti kolum, kas ti Biag…, ket mabalin nga usaren tapno maipakaawat kadagiti agbasbasa ti posisyon ti mannurat mainaig iti inaldaw a pakaseknan dagiti tattao.

Ngem nu ti programa iti radyo wenno TV ket us-usaren laeng tapno padaksan dagiti opisyales a saan tayo a kayat, wenno tapno pabangluen dagiti politiko a mangmangted kadatayo ti pagbiag iti pamilya tayo ken sagpaminsan a pagkape iti Luisas’s, uray awanen ti 4th Estate.

Saan tayo nga adda iti serbisyo ti masmidya nu saan tayo a nakasagana a mangted ti pudpudno a serbisyo-publiko nga isu’t simbolo ti masmidya. Nu ti midyum tayo ket inusar laeng tapno pabainan ti maysa a grupo wenno maysa nga indibidwal, uray awan kadatayo daytoy a gundaway.

Mausar koma ti masmidya tapno mang-awis ti opinyon-publiko iti naduma-duma nga isyu. Agbalin koma a venue dagitoy a midya tapno maaddaan ti naaan-anay a diskusyon dagitoy nga isyu ken tapno maikkan ti umno nga ideya dagiti agdengdengngeg, agbuybuya ken agbasbasa kadatayo.

Umas-asideg dagiti tattao kadatayo gaputa bigbigenda ti saad tayo kas miyembro ti 4th Estate. Ta nu awan ti tsansada a magaw-at ti ehekutibo, lehislatura wenno ti hudikatura, iti masmidya ket ad-adda a dakkel ti gundaway dagiti tattao a maidanon ti masmidya dagiti arungaingda. Daytoy ket saan tayo koma ipaidam kadakuada.

Iyasideg tayo ti bagi tayo iti tattao. Imbes nga agbalin nga arogante ket allukuyen tayo koma dagitoy nga umasideg kadatayo. Isawang tayo ti saanda a maiyebkas. Ipadanon tayo ti saanda a maibaga kadagiti mannuray.

Agadal tayo kadagiti kaaduan. Riknaen tayo dagiti parikotda. Agserbi tayo a pudpudno kadakuada. Iti kasta, pudpudno nga agbalin tayo a masmidya.

Saan tayon a singiren dagiti kakadua iti masmidya panggep iti panakaipatungpal ti Code of Ethics. Saan tayon nga urayen a mabukel pay ti maysa a press council a mangkita ti panaglabsing tayo iti akem tayo iti masmidya. Adda iti tunggal outfit, organization ken indibidwal a kameng ti masmidya a mangkita nga awan ti madaldalapos a karbengan iti panangitag-ay tayo ti press freedom.

Kitaen tayo man bassit, kakadua! #

Home > Op-ed | Back to top