Home > Op-ed | To bottom

Pamadayaw kadagiti Nanang

Anya kano ti Mother’s Day? Pamadayaw daytoy kadagiti nanang a naikeddeng iti maikadua a Domingo iti bulan ti Mayo daytoy. Kayatna a sawen ket itatta a Domingo, May 8. Ngem sakbay ti Mayo 8, adu ti komersyal iti TV ken radio, uray pay kadagiti dyaryo a mangpalagip iti paggastusan…

Idi ket masapa nga agrugi a gumatang ti greeting cards dagiti ubbing ken dadduma pay a tattao tapno maibusonda pay. Malaksid iti cards, adda pay gastos iti stamps. Itatta ket mas simple koma ta umanayen ti text messages a piso-piso. Ngem saan met ta iti tinaray ti panagdur-as, immadon dagiti fastfood stores ken shopping malls a nagbalin a pagpasyaran dagiti tattao. Uray koma awan ti plano a gumatang wenno mangan ti tila-tila ket inton nagpasyarda iti malls ket saan a mabalin nga awan ti ginatang sakbay a rumuar.

Naikeddeng dagiti dadakkel a negosyante daytoy. Dagitoy a negosyante, a kadauyan nga Amerikano a kumpanya, ti mangkonkontrol ti sangalubungan a kultura. Inkeddeng dagitoy a higante a kapitalista dagiti piyesta nga awan iti ordinaryo a kalendaryo. Uray pay ti dadduma a piyesta a paggastusan ti adu a pagilyan ket isuda’t nangibangon.

Ti Valentine’s Day, kaspagarigan ket nailako kas maysa nga aldaw dagiti puso. Iti daytoy nga aldaw ket agay-ayat dagiti kapitalista gaputa napunno dagiti restaurant, hotels, inns ken sinean. Maibus dagiti sabsabong, adu ti text messages a maipatulod ken uray dagiti old-fashioned a regalo ken greeting cards ket agkuti kadagiti mataptapukan nga estante.

Ti Mother’s Day ken uray pay ti Father’s Day ket kasla met Valentine’s Day, Christmas ken New Year’s Day. Agpapada dagitoy a pagragsakan dagiti kapitalista.

Kadagiti nakurapay nga umili iti syudad, manmano ti makaammo nga adda ti Mother’s Day, Father’s Day, ken dadduma pay nga aldaw a pinarsua dagiti negosyante tapno agtalinaed a napaspas ti panag-urnong da’t dadakkel a ganansya.

Kadagiti ordinaryo a tattao, saanen nga espesyal nga aldaw daytoy, no ti pagbatayan ket dagiti konsepto dagiti ganganaet. . Anya koma kano ngay ti nagdumaan ti Mother’s Day no inaldaw met ket mabalin nga ipaka-awat tayo kadagiti nangipasngay kadatayo ti panagyaman tayo kadakuada.

Saan laeng nga iti Mayo 8 wenno maysa nga aldaw iti makatawen a lagipen tayo nga adda dagiti Nanang a mangipangpangruna iti pagsayaatan dagiti ubbing nga inda impasngay.

Ikkan tayo kano ti bakasyon dagiti Nanang, uray maysa laeng nga aldaw iti makatawen. Iti ag-agpaysuna, uray maysa nga aldaw, saan a mabalin nga agsardeng dagiti Nanang iti saadda a kas Nanang. Kas kunada: Mothers work 24 hours a day, 365 days a year with no vacation leaves, nor sick leaves, nor pay slips. They love with no conditions, nr borders; no buts nor ifs.

Mother’s Day wenno saan, lagipen tayo amin dagiti Nanang nga inaldaw a mangsagsagrap ti nakaro a panagrigat gapu iti nakaro a krisis ti sangalubungan. Isuda ti inaldaw nga agpampanunot no kasano manen a pakanen, kawesan, paiskwelaen ken abayda. Isuda ti nagtaripato kadagiti nalalaing nga annak ti panawen.

Lagipen tayo dagiti Nanang a nagsakripisyo a nag-uksob tapno patalawen dagiti soldado iti Chico Dam. Inayon tayo a saan a lipatan dagiti Nanang a nagpasardeng ti panagminas iti Mainit ken iti nanglapped iti open pit iti Itogon. Saan tay met a liplipatan dagiti Nanang a nangidaulo kadagiti umili a limmaban iti San Roque Dam.

Saluduan tayo dagiti Nanang a nangsuporta kadagiti welga ti mangmangged kadagiti kaminasan ti Benguet, ken dagiti Nanang a nangsuporta kadagiti lallakayda a drivers ti jeepney a nairaman iti tigil pasada.

Lagipen tayo dagiti Nanang a nangbantay kadagiti demolisyon ti balbalay kadagiti syudad, dagiti Nanang a nangimaton iti operasyon-militar kadagiti aw-away.

Makipagrikna tayo kadagiti Nanang a mangay-awan kadagiti ubbing a saanda nga annak bayat a napanawanda dagiti bukodda a dungngo tapno makabirok ti pagbiag kadagitoy iti ballasiw-taaw.

Makiladingit tayo kadagiti Nanang a naawanan ti annak a mannurat, organisador, ken uray pay mannakigubat.

Padayawan tayo dagiti Nanang nga uray saanda a napadasan ti nangipasngay ti bukodda nga annak ket makaitedda latta ti naan-anay a panagayat kadagiti ubbing.

Uray dagiti Nanang nga awan ti biological womb, pamadayaw ti ited tayo, iti dakkel a puso da.

Sapay koma ta amin a Nanang ket addaan ti naan-anay a pigsa a kankanayon, inaldaw iti atiddog a panawen. #

Home > Op-ed | Back to top