Home > Op-ed | To bottom

Desisyonan tayon ti BENECO

Iti panangkayat ti Benguet Electric Cooperative (BENECO) a mailawlawag dagiti isyu mainaig iti conversion na kas maysa a pudno a kooperatiba, nang-ayab daytoy ti konsultasyon kadagiti maseknan idi Biyernes. Saan unay nga adu ti immay ngem maibagak a dagitoy ket naaddaan ti naan-anay a panag-awat iti isyu ti conversion.

Naamuan iti nasau a konsultasyon a mabalin daytoyen nga agrehistro iti Cooperative Development Authority (CDA) kas non-stock, non-profit a kooperatiba. Ti masapolna laeng nga aramiden ket ti agited ti certificate of capital shares kadagiti member consumers. Daytoy ti mangpaneknek nga adda’t kontribusyon dagiti miyembro a konsyumer iti nasau a kooperatiba ti elektrisidad.

Kuna ni General Manager Gerardo Verzosa a saanen a kasapulan nga agsingir manen daytoy kadagiti umili tapno maaddaanda ti share of stocks. Mayat daytoy ta nu kitaen tayo ket nabayag nga agit-ited dagiti konsyumer ti BENECO ti kontribusyonda kadagiti alikamen ti kooperatiba babaen iti bayad iti kuryente.

Ti nilaon dagiti linteg ti nangtikaw uray kadagiti kameng ti masmidya. Ibagbaga ti Sec. 57 ti Electric Power Industry Reform Act a masapol agrehistro dagiti electric cooperatives (ECs) kas stock cooperative iti CDA, wenno kas stock corporation iti Securities and Exchange Commission (SEC). Ngem awan iti Cooperatives Code ti kategorya nga stock cooperative.

Isunga uray dagiti opisyales ti CDA ket naaddaan da’t dakkel a problema iti panangipatungpal iti EPIRA. Ti maysa nga opsyon ti CDA ket akseptaren dagiti ECs kas miyembro iti agdama a kasasaad dagitoy. No iti kaso ti BENECO, insingasing ti maysa nga opisyal a mabalin daytoy nga agrehistro kas non-stock, non-profit cooperative.

Ti opsyon ti BENECO a mangirehistro kas non-stock non-profit cooperative ket mangted ti gundaway tapno laeng maliklikanna daytoy ti panagbayad iti P54 milyon a buwis a singsingiren ti probinsya ti Benguet. Kuna ni Verzosa a likliklikanna met laeng a mangsingir ti nayon a bayad ti kuryente nga inna ited kas buwis, uray mabalinna nga aramiden daytoy babaen iti EPIRA.

Anya ti dadduma nga opsyon ti BENECO? Madi nga agrehistro daytoy kas stock corporation. Agbalinto a pribado a korporasyon ti BENECO. Madi met nga stock cooperative ta ti mabingay nga interest ti capital share ti addanto iti panunot dagiti miyembro. Iti uray anya kadagitoy nga opsyon, ti ganansya, saan a ti serbisyo, ti maipangpangruna.

Masapol maiwaragawag kadagiti miyembro dagitoy nga opsyon, tapno nu umay ti General Assembly inton May 28, maipangpangruna ti interes dagiti kaaduan a konsyumer ti kuryente.

Nangnangruna, uray sa dagiti mangpanday ti linteg ket masapol a malawagan tapno ti pandayenda a linteg ket agtitinunos ken agpayso nga agserbi kadagiti kaaduan a tattao. #

Home > Op-ed | Back to top