Home > Op-ed | To bottom

Mapukpukaw a talek, maigalgalot a mannurat

“Apay a kasla mabuteng ka, Manong?” makasalsaludsodak iti drayber ti taxi a nagluganak idi maysa a rabii. Ngem, uray siak ket adda’t amak ko nga agawid a maymaysak gaputa, nganngani tenngnga’t rabii.

Awan ti tagtagarik ket kitkitaek ti drayber a kanayon nga agtawtawag iti hand-held radio. “Agkara-eddep,” kunana ngem saan a siak ti katongtong na. Nakaul-ulimek iti uneg ti taxi. Awan ti sounds, ti laeng sungbatna iti kasauna nga agsalsaludsod nu ayannan. Kasla kada kurbada ket agdial isuna.

Addan sa met ti amak dagiti drayber, karkaro nu rabii. Nu saan a hold-up, mabiktimada ti anyaman a krimen. Uray babbae ti inluganda.

Iturong ko koma ti lugan iti kadawyan a pagdisdisaagak. Ngem nasipnget la unay ken saan unay a pagpagnaen ti lugan ti nasau a kalye. Karkaro nga agbuteng ni Manong, kunak iti nakem ko.

“Uray magmagna akon,” kunak sakbayak nga agbayad. “Ingat po kayo,” kunak pay a nagpakada santo nagsau ti drayber.

“Urayennak nga agbwelta,” kunana. Saan a naka-anos ket sinaludsodnak nu apay a narabiiyannak. Nabayagna siguro a nagpanunutan nu kasanona nga iyebkas ti adda’t panunotna.

Sakbay a nakabuwelta ti taxi ket naamuan ni Manong Drayber a maysa ak a mannurat. Nariknak a kasapulak nga ibaga kenkuana nu apay a rabrabiiak a nagawid idiay a rabii. Ket idi imbagak a masapol nga ag-overtime dagiti dyarista, nakitak a nag-isem ni Manong.

Uray siak, agdandanagak sakbay a nagsau ni Manong. Tila um-umay iti panunot ko. Saan laeng a ni Manong ti pagdandanagak. Uray dagiti dadduma pay a tattao a kasapulan a rumuar tapno agbirok ti pagbiag iti rabii ket agpegpeggad a madangran. Karkaro iti syudad nga ayan ti naduma-duma a klase ti kriminalidad.

Iti bassit nga iskinita a nagnaak, adda ti naagawan ti cellphone idi napalabas a tawen. Nasipnget daytoy ta awan ti street light. Natalna ti panunot ko a nagna ta ammok nga agarayat dagiti kakaarruba nu ag-ikkisak. Agtaol dagiti aso ken adda nga adda’t aglukat ti tawa ken silawna.

Ngem, kaarruba, ti nangted ti talna kaniak ket ti panunot nga ammok dagiti kakaarrubak, ken am-ammodak. Maysa pay, adda’t talek ko kadakuada.

Kasano ngay kadagiti kalsada iti syudad a saandak nga am-ammo? Ay kaarruba, awan ti turedko a magna iti syudad uray nalawag dagiti kalsada nu rabii. Uray to pay aldaw ket adda’t mapaltugan nga awan ti makaasideg tapno umarayat, iti rabii pay? Agpaidam ti talek ti uray siasino, nu kastoy.

Uray aldaw, nu kastoy a kasla awan ti maaramidan dagiti pulis tapno kamaten dagiti kriminal, kabutbuteng latta.

Adda’t misa idi April 7 para kenni Romy Sanchez iti paset ti palengke a nakapaltuganna. Ti kina-adu ti naurnong a naduma-duma a tattao, saan a mailibak nga adda’t amak ti adu kadagiti aktibista a dimmar-ay. Amin a saan nga am-ammo a tao ket mabalin a suspetsa, karkaro itatta a saan pay a natiliw ti kriminal.

Amin a saan nga am-ammo ket mabalin a ni Aris Vinuya, ti kunada a nagan ti kriminal.

Agsisinnipot dagiti tattao. Naikkat ti talekda iti pada a tao. Nalagip ko nga idi pamunponna idiay San Fernando ket adu ti agal-ala ti litrato. Agpinpinictureda, kuna ti maysa a kagiddan ko a nagna. Iti panunot ko, agpakpakaasi ak nga aguray koma ta maidulin a nasayaat ti natay.

Nakarigrigat a rikna ti maawanan ka’t talek iti padam a tao. Masapol nga agannad. Masapol a mangsipot.

Kasapulan, kuna dagiti pada a mannurat. Kastoy aya nga agpayso?

Karkaro ta itatta ket uray dagiti mannurat ket nagbalin a target ti kumarkaro a panaglabsing ti karbengan kas tao. Saanak a makatalna iti kastoy a kasasaad. Maigalgalot manen ti panunot dagiti mannurat. Mapukpukaw pay laeng ti waya-waya. Martial law pay, aya? #

Home > Op-ed | Back to top