Home > Op-ed | To bottom

Dayamudom mainaig iti danum

Saanak a mangala ti danum ti Baguio Water District (BWD) inton ti Benguet Corporation (BC) ti agiyeg ti bulk water supply. Adu kadagiti kakaarrubak ti agibagbaga nga umayto ti danum iti amin a sulsuli iti syudad. Ngem saanak latta a mangala ti danum nga iyeg ti BC.

Kasano ngata nga umay ti danum iti amin nga suli ti Baguio ket saan met a nalpas ti panangiwayat dagiti tubo. Agpayso nga adda’t naala ti Local Water Utilities Administration (LWUA) a pundo a nagapo iti AusieAID ngem daytoy ket naibus a saan a nalpas ti proyekto.

Isu daytoy ti inbutaktak ni Benjamin Romualdez, presidente iti BC idi pinaay daytoy ti Pre-qualification Bids and Awards Committee (PBAC). Kuna ni Romualdez idi a madi ti BWD nga i-award ti bulk water supply iti uray siasino gaputa maduktalan ti publiko a saan a nalpas ti proyekto ti LWUA a rehabilitasyon ti pasilidad para iti danum.

Ngem nakasagana kano ti BC a kumpletuen dagiti tubo inggana makadanun kadagiti balbalay, ited laeng ti BWD ti kontrata kenkuana. Kitaen tayo nu kasano nga ipatungpal daytoy ti BC inton ited ti BWD ti kontrata. Kaluban nanto dagiti opisyal ken pulitiko iti Baguio a nairaman iti korapsyon ti pundo ti LWUA.

Ngem uray pay kasta, saanak nga agala ti danum ti BC inton umay ti bulk water.

Ag-anosak nga agpadeliver kadagiti babassit a water delivery trucks nga agrikrikus kadagiti luglugar nga awan ti danum.

Ti danum ti BC nga iyegna iti syudad ket nangina. Iti bidding, P39.99 ti presyo ti danum. Ngem saan a daytoy ti presyo ti danum inton umayen ti bulk water supply project. Nailanad iti Terms of Reference (TOR) nga amin a gastos iti panagiyeg ti BC ti bulkwater iti syudad ket mabalin nga inayonna iti presyo ti danum. Dagitoy a gastos ket pakairamanan ti kuryente, suweldo dagiti mangmangged ken ti foreign exchange, wenno ti panagngato ti presyo ti dolyar.

Ammo tayo met a ti Itogon ken Tuba a pagapuan ti bulk water supply ket nababbaba ngem ti Baguio isunga mangkasapulan ti BC ti dakkel a gatad tapno maisang-at na’t danum iti Baguio.

Magna iti public consultation sakbay nga ingato ti BWD ti singirna iti danum… kaano ngay dayta a public consultation? Naladawto dayta inton naitednan iti BC ti kontrata ti bulk water.

Ngem adda pay ti dakdakkel a rason nu apay madik nga agala ti danum ti BC. Daytoy ket danum a nasabidungan, narugit ken napnuan ti sakit ti nakem. Impaganetget ni Romualdez nga adda ti mekanismo ti BC tapno maikkat dagiti saan a kasapulan a chemical ken mineral iti danum nga iyegna. Kasanona ngata a maisegurado a nalinis ti 50,000 CMD a danum? Ti general manager ti BWD mismo ti nangkuna idi a saanna a maisegurado daytoy.

No siak, madik nga usaren ti danum nga adda’t lead, cadmium, manganese ken mercury. Dagitoy mismo ti sabidong a nagapo iti sigud a minas ti BC iti Itogon.

Kuna dagiti kakaarubak a nasken ngarud a supyaten daytoy bulk water supply project. Kas dagiti umili ti Itogon, nasken laeng a kontraen dagiti residente ti Baguio ken Tuba ti bulk water supply project. Lapdan tayo daytoy itatta no madi tayo nga agbayad ti nangina, narugit, ken napnuan-sakit-nakem a danum iti uneg ti 25 a tawen. #

Home > Op-ed | Back to top