Home > Op-ed > BIAG TI AGKAKAARUBA > February 20, 2005 | To bottom

Kooperatiba ti kuryente

Mayat nga agbalin a pudno a kooperatiba ti kuryente. Amin a tao ket agus-usar ti kuryente ken ad-adu a nakurapay nga umili ti agnamnama iti anyaman a benepisyo a maiyeg ti kooperatiba.

Idi naglukat iti panagmiyembro ti Benguet Electric Cooperative para iti membership, adda ti nangngeg ko a nagdamag, “Kasano ngay ti patronage refund ken dividends?” Barasungiad a sinungbatan ti nakamisuot a teller daytoy isunga saanen a nakatagari ti nagsaludsod.

Inggana itatta, saan pay a nakasagana ti BENECO a mangted ti patronage refunds ken dividends kas pudno a kooperatiba. Uray ti certificate of capital share ket saanna pay a naisagana. Nu saanak a nagbiddut ket 1994 wenno nasapsapa pay idi nag-awis ti miyembro ti BENECO kas kooperatiba.

Ibagbaga met ni GM Gerardo Verzosa a ti 103,000 a nasurok a konsyumer ti BENECO ti nagparuar ti dakkel a kantidad tapno mabaydanna ti adu nga utangna iti National Electrification Administration (NEA) ken nangpadur-as ti adu a pasilidad ti BENECO. Isunga, kunana nga saanen a nasken nga agsingir pay daytoy ti capital share iti tunggal miyembro. Ti malagip ko ket membership fee ti binaydak para iti land lady mi idi.

Ngem inggana itatta, saan pay a naikur-it dagiti accountants ken bookkeepers ti BENECO ti kontribusyon ti tunggal miyembro-konsyumer. Ngem mabalinda nga aramiden daytoy iti mabiit a panawen… agyaman tayo iti kuryente a mangpakurkurri kadagiti kompyuter.

“Kasano ngay daytoy? Adi pay makolektar tayon ti saan a naited a patronage refunds ken dividends?” inulit dagiti kaarruba tayo ti saludsod. Mairugi manen a maisimpa pay dagiti records sakbay ti amin.

“Saan tayo a maikkan ti kuryente ti nasurok-kumurang a 100 sitios ti Benguet nu ited tayon ti patronage refunds,” kuna manen ni GM. Ipapilitna a serbisyo ken nalaklaka a kuryente ti benepisyo a naited nan.

“Ay tuan,” kuna ti kaarruba nga i-Benguet. Kasano aya nga agpayso nga agbalin a pudno a kooperatiba ti kuryente ti BENECO? Kasano a pudno nga agserbi iti interes ti rinnibu a miyembro-konsyumer daytoy?

Nangnangruna, stock cooperative ti kuna ti linteg nga opsyon ti BENECO nu kayatna nga agregister iti Cooperatives Development Authority (CDA). Kuna met dagiti expert ti kooperatiba a non-stock, non-profit koma ti maysa a kooperatiba. Ngem adda met ti nagbalin nga stock coop. Inton agbalin daytoy nga stock coop, alaen dagiti dadakkel ti stock-holdings da ti adu a benepisyo.

Iti kasta, saanen a dagiti ad-adu a babassit ken nakurapay a miyembro ti maka-ala ti benepisyo.

Ngem nakarkaro nu ti agbalinan ti BENECO ket kas maysa nga stock corporation. Kuna dagiti makaammo a maalimon dagiti dadakkel a korporasyon ti kuryente daytoy. Malaksid iti pannakaalimonna, ganansya ti addanto iti panunot dagiti ag-manehar ditoy. Dumakkel tu manen ti baydan tayo iti kuryente.

Agtalinaed koma a non-stock, non-profit daytoy. Tapno iti kasta ket saan a ti ganansya nu di ket ti serbisyo ti maipangpangruna.

Adda iti mapangeddeng a panangimanehar dagiti responsible ken manangisakit a managers ken Board ti masakbayan ti kooperatiba ti kuryente. Dagiti miyembro/konsyumer koma ti kangrunaan nga adda iti panunotda ta saanda nga ag-asta kas corporate managers iti maysa nga empresa a tagtagikuaen ti 103,000 a pamilya.

Nu kunada a ti linteg ti agbasbasol kas iti Electric Power Industry Reform Act (EPIRA), rumbeng laeng koma a supyatenda daytoy a linteg ken itrabahoda koma a mawaswas daytoy. Saan nga ti panangipasa ti basol ti inda ar-aramiden ta isuda met ti mapangeddeng.

Iti kastoy, marugian tayo a daliasaten ti atiddog a dalan nga agturong koma iti pudno a kooperatiba ti elektrisidad. #

Home > Op-ed > BIAG TI AGKAKAARUBA > February 20, 2005 | Back to top