Home > Op-ed > BIAG TI AGKAKAARUBA > February 6, 2005 | To bottom

Isubli dagiti kalsada ken parke iti kontrol ti syudad

Saanen a nainkalintegan a pag-iinnagawan itatta ti Jadewell Parking Systems ken ti syudad ti Baguio dagiti kalsada ken paset ti Burnham park.

No intay amirisen, dagiti kalsada ket saan a nasken a pagparkingan dagiti luglugan.

Nalipit dagiti kalsada ti syudad gaputa ti kagudua iti agsinnumbangir ket napunpunno ti nakaparada a luglugan. Isu daytoy ti pakaigapuan a dagiti tattao ket magnada iti tengnga ken nakaro ti dagsen ti trapiko uray anya nga oras ti aldaw.

Karkaro a saan a napintas a buyaen dagiti paset ti Burnham Park kas iti Lake Drive a nagbalin a parking lot. Imbes a dagiti agpasyar ti magna kadagiti kalsada iti Burnham Park, nalipit unay dagitoy idi addaan dagiti nakaparada a luglugan. Kasta met ti Mines View Park ken dadduma pay a public roads ti syudad.

Maymayat nga interamente a walking spaces ti amin a paset ti Burnham Park, karkaro ta daytoy laengen ti mayat a pagnaan ken pag-ehersisyuan dagiti ubbing ken uray pay dagiti senior citizens.

Karkaro a saan a nasayaat ti rikna dagiti tattao a naagawan ti pagnaan ken pagpasyaran ta dagitoy gayam ket uppat a tawen a nagnegosyuan ti Jadewell. Mano a milyon ti ibagbagana nga inyegna iti syudad? P7 milyones kano.

Ket nu ti gatad ket kagudua laeng ti net income ti Jadewell iti las-od ti 4-5 a tawen, P7 milyones ngarud ti naurnong na met para iti maysa a pamilya nga immay nga agnegosyo kadagiti kalsada tayo.

Saan a kapapati daytoy. Ti kuna ni Mayor Braulio Yaranon, naduktalan ti Commission on Audit (COA) idi kalabes nga agsasasaur ti Jadewell kadagiti financial reports na iti syudad.

Ngem saan a daytoy ti sentral nga isyu. Ti nasken a tongtongan ditoy ket ti pannakaisubli dagiti kalsada ken parke kadagiti umili.

Ti nasurok a kuwarenta a mangmangged ti Jadewell ket mabalin a suwelduan ti syudad inton maisubli iti kontrolna dagti kalsada. Ad-adunto ti masuwelduan a mangmangged kadagiti kalsada inton amin a maurnong kadagitoy ket maipan iti city treasury. Dayta ket nu saan a makurakot dagitoy a kuwarta. Ngem sabali manen a tongtongan daytoy.

Mayat ta narugian ni Mayor a maisubli kadagiti tattao ti kalsada ken parke. Nasken laeng a pasarunuan dagiti adda iti konseho ti panangiyaramid ti umno a plano kadagitoy ta saan manen a sublaten ti dadduma a pribado a kumpanya nga awan to sabali a namnamaennda nu di ket ti agnegosyo. #

Home > Op-ed > BIAG TI AGKAKAARUBA > February 6, 2005 | Back to top