Home > Op-ed | To bottom

Segregation wenno inclusion?

Kadagitoy ket nadanon iti imatang ti lokal a konseho ti Baguio ti sumagmamano nga arungaing dagiti nakurapay nga umili iti syudad.

Maysa laeng ti isyu ti demolisyon iti uneg ti Camp John Hay forest reservation kadagitoy nga isyu. Segregation, wenno ti pannakailasin dagiti nagbalayan dagiti umili iti tagtagikuaen itatta ti Bases Coversion Development Authority ti kayat a mapaspasan ti Committee on Human Rights ti konseho, nga indauluan ni Konsehal Jose Mencio Molintas.

Madi ti umili iti plano a segregation gaputa ti kaipapananna daytoy ket ti panangilako ti BCDA kadakuada ti dagdaga a sigud a bagida. Kasano didiay?

Kuna ti ORNUS, ti organisasyon dagiti nakurapay nga umili iti syudad, agilaklako ti BCDA ti dagdaga iti balor ti P3,000 kada metriko kuwadrado. Inala ti ORNUS nga ehemplo ti napasamak iti Scout Barrio. Kakaisu daytoy iti 13 a barangay a sinakop ti BCDA nga immanamong iti plano a segregation. Ti napasamak ket bayadan dagiti umili ti Scout Barrio dagiti dagdaga a naitakderan ti balbalayda.

Ti panagserrek iti segregation a proseso ket mangbigbig a dagiti daga iti 13 nga apektado a barangay ket tagikua ti Camp John Hay. Iti kasta, bayadan dagiti umili dagiti daga a nagtakderan ti balay, Daytoy a pamuspusan ket kontra-hustisya kadagiti bumalay a nabayag iti lugar.

Kuna ti ORNUS a ti Scout Barrio ket maysa a housing project para kadagiti sigud a forest guards ti Camp John Hay. Iti panangkitak, nainkalintegan laeng a maited ti daga kadagiti umili iti 13 a barangay ta nasurok a 30 tawendan a nagyan ken pinadur-as da ti lugar da.

Agbabbabawi dagiti umili ti Scout Barrio itatta gaputa nakitadan ti kamali nga inaramidda idi immannamongda iti segregation process.

Kuna ti ORNUS nga imbes a segregation ket inclusion ti ar-aramiden ti Camp John Hay. Agisaysayangkat daytoy ti survey kadagiti dagdaga a saanna nga us-usaren iti agdama ken inaynayonna dagitoy iti sakopna, kuna ti ORNUS. No adda ti claimant ket pagbayadendanto dagitoy iti presyo a kaykayatda.

Sigun iti mapa nga eggen ti John Hay Management Corporation, sakupenna daytoy ti adu a dissu a nairamanan ti Camp 6 ken Camp 7 iti Kennon Road. Malaksid a sakupen na met ti adu a dagdaga iti barangay Loakan Proper, Loakan Apugan, Loakan Liwanag, Lualhati, Hillside, Lucnab, Happy Hollow, ken dadduma pay karaman ti paset ti Baguio Country Club.

Iti agdama ket adda ti moratorium iti panagrakrak dagiti balbalay ken sanikua iti uneg ti reservation. Kasta met a maparitan dagiti umili nga agipatakder ti baro a pasdek. No adda ti improvement wenno repair ket masapol a magna iti kapitan ti barangay nga isu ti agindorso tapno maikkan ti permit a magna dagiti ramramit iti uneg ti reservation. Adu ti check point ken makumpiska dagiti ramit nga awan ti permitna. Ay inaya, awanen ti waya ti umili iti kastoy.

“Kasano ngay dagiti dumakdakkel a pamilya?” kuna ti maysa a tatang. Bayatna a maur-uray ti pannakaited kadagiti umili ti naan-anay a karbengan iti daga, lumawlawa ti umili a nasken nga agbalay. Lumiplipit ti dagdaga a mabalindan a tagikuaen inton mailako ti BCDA dagiti dagdaga kadagiti adda’t kabaelanda a gumatang.

Masapol a paspasan dagiti agturturay dagiti desisyon a makatulong iti umili. Saan a dagiti pakairurumnan ti tattao ti inda ar-aramiden. Ti pagsayaatan ti ad-adu koma ti panunutenda, saan a ti pagimbagan dagiti sumagmamano a negosyante. Karkaro a saan koma a dagiti ganganaet nga imbestor ti mapabpaboran.#

Home > Op-ed | Back to top