Home > Op-ed | To bottom

Meningo ken dadduma pay a pakaseknan

Iti las-od ti dua a bulan a nasurok, kaarruba ket kasla naikur-it ti syudad tayo iti mapa ti sangalubungan babaen kadagiti pablaak panggep iti meningococcemia. Negative publicity dagitoy, kuna dagiti negosyante iti syudad tayo, gaputa nakisayyan ti immayan dagiti turista.

Pabasbasulen dagitoy a negosyante dagiti kameng ti masmidya iti hysteria a rinumsua babaen kadagiti pablaak. Siasino ti nagpanic? Siasino ti apektado kadagiti naiwaragawag kadagiti pagiwarnak? Siasino ti pudno a naapektaran ti meningococcemia?

Dagitoy a saludsod ket narigat a sungbatan, kaarruba. Kadagiti nakurapay nga umili ti syudad, nagtultuloy a nagtegged dagitoy iti inaldaw-aldaw. Uray kunada nga adda iti palengke ti bacteria ti meningo ket inaldaw latta a naglako dagiti tindera. Inaldaw a nagbunag dagiti kargador, ken inaldaw anagdeliver ti makan ken mailako dagiti aglutluto ti makan.

Binmassit ti urnong ken naglakuan dagiti tindera. Bimmassit ti koleksyon dagiti agideldeliver ti makan. Bimmassit ti ganansya dagiti negosyante.

Ti kina-agpaysuna, nu adda ti nabaot iti madi nga epekto ti meningo, daytoy ket ti nakurapay nga umili iti syudad. Gaputa kimmapoy ti negosyo, saan a kabaelan dagiti negosyante nga agpaadu ti produksyonda. Kapilitan a nagbawas da’t tauhan ta awan met ti gumatang ti produkto. Awan ti maaramidan ta awan met ti malakuan, kuna ti maysa a prodyuser.

Uray dagiti kargador iti palengke ket bassit ti nabirukanda kadagitoy. Karkaro dagiti agpalpalama. Dagiti drayber ti dyip ken taxi ket agrinrinnikosda, bassit ti turista, kunada.

Pinabasolda manen ni Mayor Braulio Yaranon gaputa insawangna a dagus iti masmidya nga adda’t meningo iti syudad. Kuna met ni Mayor a nasken laeng a maamuan ti tattao ti kinapudno. Nu adda ti pinanunotna ket isu ti sitwasyon ti salun-at ti syudad a danunan dagiti turista. Agpayso a kayatna nga umay dagiti tattao ngem kayatna met a maamuanda nga adda ti meningo alert tapno ammoda’t agannad.

Bayat a pagtungtungan ti meningo iti ado a sektor, adda dita a nakalayat ti kontrata iti bulk water project iti baet ti Benguet Corporation ken ti Baguio Water District, ti peggad iti demolisyon kadagiti komunidad iti uneg ti Camp John Hay reservation ken iti dadduma pay a luglugar dagiti nakurapay nga umili ken ti ngumatngato a singir ti kuryente.

Ngem, nakalung-aw bassit ti tattao iti problema iti trapiko. Itatta ket saan unay nga atiddog ti byahe ken saan unay ti pila kadagiti terminal. Daytoy ti maysa a mayat a napasamak iti syudad tayo iti immayan ti meningo scare.

Uray ti luglugar iti uneg ti palengke ket nakadaldalus ken nawaya a pagnaan itatta. Kanayon a madaldalusan dagiti sigud a naangot a luglugar ken naikkat dagiti rugit a mano a tawenen nga adda idiay. Dagiti terminal ti dyip ket sagpaminsan a naiyalis iti batog ti city hall ken nabangbanglo dagitoy a saan a kasla idi. Sapay koma ta kanayon a kastoy.

Wake up call daytoy meningo, kuna ti maysa a konsehal. Ngem, kaarruba, mano aya met a milyon ti nakurakot kadagiti vaccines ken prophylactic antibiotic drugs kadagitoy? Agsalsaludsod laeng ti maysa a kaaruba… #

Home > Op-ed | Back to top