Home | To bottom

Eleksyon distrito ti ARIA, linapdan ti mannalon

BANGUED, Abra (Feb. 2) — Nangisayangkat ti Abra River Irrigators Association (ARIA) ti maysa nga eleksyon distrito idi Enero 29, sadiay Tayum, Abra iti gunglo 1, ngem simmagrap daytoy ti adu a batikos ken kwestyon kadagiti umili a mannalon a lehitimo a miyembro ken agus-usar ti pasayak ti ARIA, Incorporated. Pormal nga inrehistro dagiti mannalon dagiti obserbasyon, reaksyon, ken komentaryo da ken ti kadawatanda nga itantan pay ti mapasamak nga eleksyon agingga a saan a maiyaramid dagiti nabayagen a singasing ken kadawatan ti mayorya a kameng ken agus-usar ti nasau a pasayak.

Nalawag a nakita dagiti mannalon a nagbalin a shortcut wenno moromoro ti naisayangkatda nga eleksyon distrito iti Gunglo 1. Indauluan dagiti lideres ti Organisasyon dagiti Nakukurapay nga Umili iti Sityos (Ornus) ti panangkwestyonar dagiti maanomalya nga eleksyon. Nairaman a nabatikos ti pannakabukel ti komite ti eleksyon nga dua laeng ti miyembrona imbes koma a lima ken mapapati pay a saan a miyembro ti Board of Trustees dagitoy. Nakita pay dagiti mannalon nga awan ti naan-anay a panangdisiminar wenno pannakaiwaragawag daytoy nga addang (eleksyon) ken dagiti agenda, allagaden ti maiyaramid nga eleksyon distrito agraman dagiti napapateg ken aktibo a partisipasyon ti mayorya a miyembro ti asosasyon.

Maysa pay a pakakitaan ti kinaawan sinseridad ti ARIA ket ti panangbaddekda ti karbengan dagiti kameng-mannalon ket ti panangpawilda a bumotos ken agpapili dagiti kunada a saan a kameng, kasta met kadagiti kunada a petitioners. Karaman na daytoy uray dagiti addaan utangna ket inikkatda ti demokratiko a karbenganda a bumotos ken agpapili. Daytuy ket dakkel nga panangsalungasingda kadagiti paglintegan ti korporasyon.

Bayat a kunkundinarenda dagitoy a gannuat dagiti kunada nga ilihitimo ken peke nga agtaktakem ti ARIA, nangisingasing dagiti mannalon babaen ti panangidaulo ti unyonda nga Ornus kadagiti sumaganad a resolusyon:

1.Panangpabaro ti listaan ti miyembro babaen ti nawaya ken silulukat nga rehistrasyon iti amin nga mannalon nga masakupan ti pasayak kas ti Tayum, Bangued, Pidigan ken paset ti Penarubia
2.Napasnek nga imbentaryo ken panang-audit kadagiti sanikua ken ramramit ti Asosasyon ken ebalwasyon kadagiti kameng tapnu matudo nu anya ti pudpudno a sakit ti asosasyon.
3.Nasaknap nga imformation dessimination a mainaig ti rehistrasyon, resulta ti mapasamak nga imbentaryo ken audit, ebalwasyon ken karamanna pay dagiti allagaden ti eleksyon.
4.Ti pannakabukel ti maysa nga interim body kas independent a grupo, a mangisigurado ken mangtaming kadagiti singasing dagiti mannalon ken ti pannakipaset ti Diocese ti Bangued kas mangidaulo ta isu ti project holder iti daytoy a proyekto. Ken daytoy payen ti paggapuan ti mapataod nga eleksyon komite nga mangiwanwan ti pannakaisayangkat ti pudpudno a General Assembly.
5.Ti pannakausig a nalaing ken ti pannakaipaay ti sungbat ken hustisya dagiti risiris, grievances ken dagiti kadawatan iti mayorya a kameng babaen ti unyonda nga Ornus.
6.Pannakawaswas dagiti imbilang iti ARIA nga utang dagiti mannalon ken dagiti impilada a kaskaso iti korte a gappuanan dagiti iregularidad ken maanomalya a naiyaramid bayat ti panagtakem dagitoy a saan pulos a dimmalan iti general assembly.

Pattien unay dagiti mannalon a lehitimo a miyembro ti ARIA ken agus-usar ti pasayak a maurnos ken maisimpa dagiti problema a sagsagabaenda nulaketdi maisayangkat ken mataming a husto dagiti singasing ken kadawatanda babaen ti Ornus tapnu naan-anay ti serbisyo ti irrigasyon.

Indawatda pay kadagiti kakabsatda mannalon a suportaranda dagiti pudpudno a kandidato nga ammona nga ipateg ken salluadan iti interes ti nalawa a mannalon ken ti ipatpateg da nga asosasyon tapno saan nga maulit ti nakapaayan da a panangluko dagiti nagtakem nga opisyales ti ARIA Incorporated.

Dagitoy a panagtignay dagiti umili a mannalon iti ili ti Tayum, Bangued, Pidigan ken Penarubia ket sinuportaran ti Tignayan ti Umili a Mannalon tapno Depensaran ti Rikursos (Tumakder), maysa nga pamprobinsya nga alyansa dagiti mannalon ti Abra nga bukbuklen dagiti mannalon iti kapatagan ken up-land a paset ti probinsya. Maysa ti Ornus n kameng ti nasao nga alyansa. # Jay Peña para iti NORDIS

Post your comments, reactions to this article

Home | Back to top