Amami sadi ngato,
Dennggem dakami nga annak mo.
Dakami a babassit
Kanayon la nga agladingit.
O Diyos, sika ti kangatuan,
Lua mi ingka’t punasen,
Iti nasaem a pagbanbanagan,
Kired mi’t inka patibkeren.
Nu ilaban mi’t karbengan,
Isu pay ti pakadaksan,
Ipan dakami idiay baludan,
Dusaen dakami uray awan nagbasulan.
Naan-anay a suweldo inkami dawaten,
Dakes metten ta kayat dakami a patayen,
Agbiruk kami laeng ti benepisyo
Adda ta kami kanon a manggulgulo.
Pang-or, kugtar, kalasag ken kulata
Inpasango ti kabusor kadakami nga awan gaway na
Apay nga ikaskastoy dakami?
Awan met inaramid mi a madi.
Maawanan ti trabaho,
Maikkat iti trabaho,
Awan ti trabaho
Damag a saanen a barbaro.
Dakami’t nangiparuar kinabaknang
Man-mano’t nagnam-ay, ad-adu’t nabisinan,
Ay, saan a nainkalintegan
Daytoy a kagimongan.
Diyos Ama sika’t kalintegan,
Ti saom inka’m pagsanggiran,
Iti sangom;awan nangato, awan met nababa
Amin kenka ket agpapada.
Apo, dawaten mi garud kenka,
Bendisyon mo iti inka’m pannakilaban,
Panaggundaway inka’m gibusan,
Maipatungpal ti pagayatam.
Iti sidong mo iti inkami pagkamangan,
Iti panangibangon ti baro a kagimongan,
Madayaw ka o Diyos Ama,
Sumangpeten ti naranyag nga agsapa.