Home | To bottom

Wolfland, kinundenar ti 3rd GA ti TMK

TABUK, Kalinga (Abr. 15) — Kinundenar ti nasurok a 100 mannalon ti Kalinga ti eksplorasyon ti Wolfland Resources Inc. babaen iti maysa a petisyon a napirmaan sakbay a nagibus ti maikatlo a general assembly ti Timpuyog dagiti Mannalon ti Kalinga (TMK) idi Abril 9-10.

Panggep dagiti mannalon a lapdan ti eksplorasyon ti Wolfland.

Malaksid iti panagkundinar ti dadakkel a minas, bininsa-binsa met dagiti mannalon ti naduma-duma pay a pakaseknanda kas iti agngangabit a pangta dagiti dadakkel a kumpanya ti minas ken ti kinakurang ti subsidyo ti gobyerno para iti agrikultura.

Iti nasau a taripnong, sinupyat met dagiti mannalon ti Kalinga ti madi nga epekto ti panagminas dagiti dadakkel a kumpanya ti minas.

Kasta met a naklaat dagiti mannalon a nasaknap ti panagmula ti BT corn iti Kalinga itatta. Naamuan dagiti mannalon babaen iti maysa a panagbingay ti kasasaad dagiti mannalon iti rehiyon ti Alyansa dagiti Pesante iti Taeng Kordilyera (APIT TAKO).

Ti BT Corn ket produkto ti Monsanto, maysa a ganganaet a kumpanya nga adda iti pagilyan. Daytoy ket addaan ti genetically-modified organism (GMO) a naduktalan a saan a nasalun-at.

Sakbay a nagsisina dagiti mannalon, nabutusan ti baro nga opisyales ti TMK. # Jimmy Suwagon/NORDIS-Kalinga

Home | Back to top