2 MIN READ

Ni BRENDA S. DACPANO
www.nordis.net

BAGUIO CITY – Inarestar dagiti Marine Battalion ken Provincial Mobile Force Company da Rolando Reyes, 36 años ken Ranchie Tubban, 20, idiay Brgy. Paradise, Gonzaga iti probinsia ti Cagayan iti municipal monitoring checkpoint idi Hunio 10, 2020.

Ti dua ket agpada nga agindeg sadiay Brgy. Bunugan, Baggao, Cagayan. Ni Reyes ket addaan asawa ken dua nga annak ken ni Tubban ket baro.

Naidarumda iti panaglabsing iti Republic Act 9516 wenno illegal possession of explosive. Nagtaud ti kaso iti nabirokan dagiti autoridad a granada segun iti pulis.

Basar iti spot report ti PNP Gonzaga, pinasardengda ti van tapno kitaen ti travel authority ken ID dagiti adda iti lugan. Ditoy kano a nakita ti maysa a miembro ti marines ti granada iti likod a paset ti lugan. Gapuanan daytoy a pinababada dagiti dua nga adda iti uneg ti lugan ken pinalukatanda ti likod ti nasao a lugan.

Indaluluan ni Police Major Ronald Balod dagiti miembro ti Gonzaga Police Station a nangisayangkat ti checkpoint. Kadua dagiti pulis dagiti puersa manipud iti 20th Marine Company, Marine Battalion Landing Team 10, Philippine Marines ken ti 2nd Provincial Mobile Force Company.

Ngem segun iti report ti Karapatan Cagayan Valley, da Reyes ken Tubban ket nagitulod sadiay Ilocos kadagiti na-lockdown iti Brgy. San Vicente, Baggao idi Hunio 9. Inusarda ti van a sanikua ti nagannak ni Reyes. Iti panagsublida iti Cagayan, dimmagasda iti balay ni Odessa Soriano, babaen ti imbitasion ti naudi, sadiay San Jose, Gonzaga, asideg iti beddeng ti Sta. Ana. Ditoy a naginanada.

Bayat nga agin-inanada, binulod ni Soriano ti van ni Reyes tapno itulod ti agpa-check up iti ospital iti ili ti Gonzaga. Ni Tubban ti nagmaneho iti van ken nabati ni Reyes iti balayda Soriano. Idi nagsubli ni Tubban iti nagdagusanda a balay, simmangpet dagiti miembro ti Marines ken pinalawlawanda ti van. Kinitada ti uneg ti van ken rinitradoda da Reyes ken ti van. Dinamag dagiti marines no tagaanoda, sinnoda ken apay nga addada sadiay. Ni Soriano ti simmungbat.

Kalpasan daytoy, pinaawid isuda dagiti marines isu a naglugandan iti van ken intulodda ni Soriano idiay Centro Gonzaga. Idi nadanonda ti checkpoint, pinasardeng ti marines ken rinikisada a dagus ti van ket ditoy a nabirokan kano dagiti autoridad ti granada.

Insigida a naposasan dagiti dua ken indiretsoda iti Gonzaga Police Station. Sadiay, innalada ti selpon ni Reyes. Pinagsina dagiti pulis ti dua ken ininterogarda maipanggep iti granada.

Kinuna ti Karapatan CV a nayon daytoy nga insidente iti serye ti panagimula iti ebidensia kadagiti sibilian. Mapabpabasul dagiti inosente tapno laeng adda maireport a nagapuanan dagiti soldado ken pulis. Impanawaganda ti pannakaibasura ti parparbo a kaso kada Reyes ken Tubban.# nordis.net