Makan ala Pinoy: Sarsiado a daing a mol-mol
2 MIN READ
By BRENDA S. DACPANO
www.nordis.net
Iti kallabes, nagpasarabo kaniak ni Jo, maysa a gayyem ko naggapu iti Albay, ti daing a parrot fish (Tagalog: isdang loro, Cebuano: mol-mol). Saanko nga ammo no ania ti lokal a termino iti Ilocano iti mol-mol ngem ditoy Baguio, Chinese lapu-lapu ti awagda.
Nanaganan a parrot fish daytoy nga ikan gapu iti langa ti ngiwatna a kasla sippit ti parrot nupay kasla parrot ti marisna a naraniag nga asul. Ngem saan laeng nga asul ti marisna, agbaliw-baliw daytoy iti intero a siklo ti biagna. Maysa a hermaphroditic ti mol-mol, kaaduan a mayanak a babae ngem agbalinto a lalaki. Addaan iti natangken ken nasikkil a siksik tapno pangsalaknib kadagiti natatadem a korales a kadawyan a pagnanaedan ti mol-mol.
Aggatad iti P120 kada kilo iti tiendaan ti Baguio, nalaka kumpara iti dadduma nga ikan nangruna itatta nga agkakanginan amin a magatang. Naimas daytoy a maituno ngem no mailuto nga adda digona ket adda langlangsina (ngem gagangay met iti ikan ti nalangsi). Ngem naimas no maidaing, maipirito iti nasarangsang ken isiwsiw iti suka a nalaokan iti napitpit wenno tinadtad a bawang.
Malaksid iti pinirito a daing, mabalin met a mailuto daytoy a sarsiado. Dagiti daing a dadakkel nga ikan kas ti mol-mol, besugo ken bacalao ti naimas a maisarsiado. Mayat daytoy kadagiti sulsulinek a lugar a saanen a madanon dagiti sadiwa nga ikan, padasenyo daytoy sarsiado.
Ramen:
4-6 pidaso daing a mol-mol
4-6 pidaso kamatis, naiw-iwa
1 sibuyas, naiwa iti naingpis
3 ngipen a bawang, napitpit
1 pulgada a laya, tinadtad
1 kutsa asukar brown
1 kutsarita paminta
1 itlog, binatil
mantika, pagprito/paggisa
Panangisagana:
- Iyuper ti mol-mol iti danum iti 15 minutos. Ibelleng ti naguperan ken bugguan manen. Aramiden daytoy tapno saan unay a naapgad ti daing. No agusar iti bacalao, nasaysayaat no mailambong apagbiit ti bacalao tapno maikkat bassit ti apgadna. Paik-ikan.
- Iprito ti daing agingga nasarangsang bassit.
- Iti dakkel a kaserola wenno pariok, igisa ti bawang, sibuyas, ken laya.
- Isaruno nga ipisok ti kamatis. No nalpesen ti kamatis, itimpla ti asukar ken paminta. Nayonan bassit iti danum no saan a natubbog ti kamatis. (Mabalin nga usaren ti tomato sauce imbes a kamatis.)
- Ipisok ti naprito a daing. Iluto iti agarup 5 minutos wenno agingga maagsep ti daing ti sarsa ngem saan a liwayan a maatianan.
- Ikabil ti binatil nga itlog. Kiwaren ken adawen.
- Idasar a napudot kagiddan ti innapuy.# nordis.net
