2 MIN READ

Ni BRENDA S. DACPANO
www.nordis.net

Nabalkot iti repolyo a giniling a karne ken kadawyan nga adda innapuyna ti cabbage roll iti paset ti Eastern Europe. Karne ti baka, baboy wenno karnero ti maipalaman ditoy. Dolma ti awagda idiay Turkey wenno kadagiti pagilian iti Middle East a ti kayatna a sawen ket napaseksekan ngem imbes a repolyo, bulong ti ubas ti usarenda a pagbalkot. Kadawyan a maidasar nga adda tomato sauce-na wenno sour cream wenno yogurt. Kadagiti pagilian iti Asia malalaukan ti uong ken mabalin a wombok ti pagbalkot.

Barukong ti manok ti inusar ko ditoy ken saan ko a linaokan ti innapuy ta ipanganto laengen daytoy iti innapuy.

Ramen ti rolls:

½ kilo a barukong ti manok, tinadtad
10-12 bulong ti repolyo wenno wombok
1 tasa wombok/repolyo a naiwa iti pino
1 sibuyas, tinadtad
2 ngipen a bawang, tinadtad
2 ungkay ti celery, tinadtad
2 kutsara a mantika
Asin ken paminta a pangtimpla
Ramen ti sarsa:
1 ½ tasa a tomato sauce
Asin ken paminta a pangtimpla
1 kutsarita nga asukar (optional)
100 ml all-purpose cream
1 tasa a danum

Panangisagana:

1. Igisa ti manok iti sibuyas ken bawang. Timplaan iti asin ken paminta. No naluton ti manok, iIlaok ti celery ken wombok wenno repolyo a naiw-iwa iti napino. Iluto aginggana malpes ti wombok/repolyo. Pabaawan.

2. Iti kaserola, agpaburek iti danum. No nagbureken ti danum, ipisok dagiti bulong ti repolyo. Ilambong iti agarup maysa minuto wenno aginggana nalammuyot dagiti bulbulong. Adawen ken pabaawan. Ikkaten ti natangken a paset (duri wenno paragpag) ti repolyo. Daytoy ti pangbalkot iti ginisa a manok. Parutapan dagiti bulong nga adda pigisna. Balkuten a kasla lumpia. Uliten aginggana mabalkot amin.

3. Ap-apan ti sobra a bulbulong ti repolyo wenno wombok ti napuskol a kaserola. Ikabil ditoy dagiti cabbage rolls.

4. Paglaoken amin a ramen ti sarsa. Ibukbok daytoy iti kaserola ti cabbage rolls. Iluto iti nakapsut nga apuy iti agarup 15 minutos wenno aginggana napalet ti sarsa. # nordis.net