Libre nga irigasyon kiddaw ti mannalon
2 MIN READ
Ni KYLE EDWARD FRANCISCO
www.nordis.net
VIGAN, Ilocos Sur — Ipagpagna dagiti kameng ti Sta. Lucia-Candon Irrigators Association ti maysa a petisyon a mangkidkidaw ti nasisyaat ken libre a serbisyo ti padanum manipud ti gobierno. Basar ti nasao a petisyon, dawat dagiti mannalon ti “nasayaat a serbisyo ti gobierno para iti padanum ti kataltalunan” gaputa ti “nasaknap a kataltalunan ditoy Ilocos, ti problema iti padanum ti maysa kadagiti kadadagsenan a parparikuten” dagiti mannalon. Karaman a dinawat ti grupo ti pannakapunas dagiti back accounts dagiti miembro.
Tinudo nga ehemplo ti grupo ti napasamak a pannakalibre ti serbisyo ti irigasyon ti umagarup dua a tawen idi panawen ni Presidente Joseph Estrada. Nayon pay a basaran ti kadawatan ti asosasyon ti nabayag a panagbayaddan ti irrigation service fee ket “nasubboten ti gobierno ti nagastos iti panangipasdek” ti pasilidad para iti padanum.
“Nu naaramid idi panawen ni Estrada ti libre a serbisyo ti padanum, sigurado met a mabalin met laeng ti agdama nga administrasyon ni Pnoy,” kuna ti petisyon.
Kinuna pay ti petisyon a mannalon ti mayorya a pagtataudan ti buwis ngem isuda ti “gumawgawawa ti kasasaadna” iti gimong. Dinakamat na ti linteg manaig ti excise tax a mangipapaay ti umagarup P6.0 bilyon a buwis para iti gobierno ngem “nakirang met ti serbisyo ken subsidiyo” a maawawat dagiti mannalon manipud iti pondo.
Inyebkas met ti Solidarity of Peasants Against Exploitation (STOP Exploitation) ti suporta na iti gannuat. Impalawag ni Antonino Pugyao, Maikadua a Pangulo ti organisasyon nga adda ti kapada a kampanya nga isaysayangkatda iti tukad rehiyon ken nasyunal.
“Nairugi a maipagna ti kadawatan a libre a serbisyo a padanum ken pannakapunas dagiti back accounts idi Pebrero kas resulta ti naiyaramid nga Irrigation Summit nga indauloan ti Kilusang Magbubukid ng Pilipinas,” kuna ni Pugyao. Inbingayna pay a kagiddan ti kampanya ti gakat a linteg para ti libre nga irigasyon wenno House Bill No. 6224 nga indatag ni Anakpawis Representative Fernando Hicap.
Tapno mapalawa ti nairugi nga tignay ti Sta. Lucia-Candon Irrigators Association, kuna ni Pugyao nga agisayangkat ti STOP Exploitation ti maysa a kumperensya dagiti mannalon tapno pagtutungtungan ti kasasaad ken ladawan ti irigasyon ti rehiyon.Maibingay iti aktibidad ti panagadal mainaig ti kasasaad ti padanum ti rehiyon nga inyaramid ti dua nga non-government organizatio ken dagiti estudyante ti Development Studies Program ti UP Manila. Maiyaramid daytoy intun umay a Nobiembre 5 idiay Candon Branch Office ti National Tobacco Administration. Para kadagiti interesado a makipaset mabalin a kontaken ti numero 09261019894. # nordis.net
