Makan a la Pinoy: Bicol Express Ilokano-style

2 MIN READ

Ni BRENDA S. DACPANO
www.nordis.net

Sipud adda puotko, awan ti naramanak a ginettaan a sidami. Ti adda ket dinengdeng kas kada dinilnakan a bennek wenno sinalamagian a tinuno a buntiek wenno dalag nga aw-awaganmi ti “walang katapusan” (a digo) wenno tinenneb a dalag.

Nalabit a saan laeng nga ammo unay ni apong wenno ti nagannakko ti aglutluto.  Ngem uray kadagiti panagallatiw ko kadagiti sabsabali a lugar ti Kailokanuan, dagiti laeng sinam-it wenno kankanen a diket ti nagettaan.

Malagip ko idi kolehiyoak, nagluto diay boardmate-ko a taga-Samar ti ginettaan a naluom a bayyabas. Gapu ta nasapa pay, alas dies iti agsapa, dakami nga Ilokano a kabordinganna, ket nagbirok ti mamerienda. Linukatanmi ti kaserola ti ginettaan a bayyabas, apo unayen ti banglo na!

Mineriendami, gistay naibus! Idi simrek iti balay ti boardmate-mi naggapu iti ruar a naglaba kadagiti kawesna, agidasaren ti pingpinggan ken kutsara ta isuna ti toka iti pangaldawmi.

Nagbalaw idi nakitana a bassiten ti nabati iti ginettaan a bayyabas. “Susmaryosep!” kinunanan.
Isu gayam daydiay ti pangaldawanmi a sida. Sidaen gayam daydiay idiay lugarda. Isu a dakami nga Ilokano, nangaldawkamin iti innapuy nga indeppel iti bugguong.

Itatta, padasen met ti agluto ti ginettaan a Bikol express Ilokano-style. Pallang ken manok, imbes a liempo wenno karne ti baboy ti ramen nga usaren tapno saan unay a nakolesterol.

Ramen:
2 barukong ti manok, nailgat iti naingpis a paatiddog
2 reppet ¼ kilo a pallang wenno, naiwa iti 1 pulgada
Getta ti 1 niog, pinespes iti 2-3 tasa a danum nga apag-anem-em (lukewarm)
Sili a berde a paatiddog (pangsigang)
Sili a sairo (optional)
½ tasa bugguong a munamon wenno tirong (wenno basbassit no agusar ti nakabotelia a boneless bagoong)
4 a ngipen a bawang, pinitpit
1 sibuyas, naiwa iti naingpis
2 pulgada a laya, naiwa iti naingpis a paatiddog
2 kutsara a mantika

Panangisagana:
1. Iti napuskol a kaserola, igisa iti mantika dagiti laya, sibuyas ken bawang.
2. Isaruno nga ipisok ti karne ti manok, iluto aginggana ag-brown bassit.
3. Bayat a magisgisa ti karne ti manok, segsegen ti bugguong a munamon iti napudot a danum.
Itimpla ti digona iti magisgisar a karne ti manok. Kalpasan ti lima a minutos, ibukbok ditoy ti getta ti niog. Pagbureken iti 20 minutos wenno aginggana maluto ti manok ket dandani maatianan ti getta.
4. Ipisok ti sili ken pallang. Iluto iti 5-8 minutos.Tapno nanannanam, agusar ti dinailan a pangtimpla wenno flavoring.

Ti dinailan ket daing a pasayan a pinulbos santo sineksek a kasla cube. Magatang daytoy kadagiti tiendaan sadiay Bicol.

Gapu ta awan ti dinailan ditoy lugartayo, mabalinen ti hibe a pinitpit iti almires. Tanangen laeng ti panangikabil ta baka tuman-aw iti baybay ti kaapgadna wenno kissayan ti ikabil a bugguong no agusar ti hibe/dinailan.#nordis.net