Ni BRENDA S. DACPANO
www.nordis.net

Manipud iti Hainan, China daytoy a resipe a limmatak iti Singapore. Simple nga inlambong a manok ngem ti sekreto ket adda iti sawsawan. Manipud iti kasimplean a soy sauce ken perres wenno light soy sauce a nalaokan ti Chinese wine ken sesame oil wenno ginadgad a laya, tinadtad a bugas ti baraniw (lemon grass) ken adu pay.

Mabalin a pangluto iti innapuy ti naglambongan iti manok a maawagan a Hainanese rice. Ngem ti inaramid ko ket saan ko nga inlambong no di ket binalkot ko ti aluminum foil ti manok nga adda ti tarragon, sibuyas ken layana sako pinasengngawan, iti kasta ket nanannanam ti karne ti manok ken saan ko met a kasapulan ti naglambongan ta saanak met nga agluto iti Hainanese rice. Mabibiit a maluto no naguddua ti manok sakbay a pasengngawan, ngem maymayat a sibubukel ti manok no ilambong daytoy.

Ramen:

1 manok (1.5 agingga 2 kilos dressed)
¼ kilo a laya
2 sibuyas
4 ngipen a bawang
2 ungkay a bulong ti tarragon wenno cilantro/coriander
Asin
Paminta

Sawsawan1:

Light soy sauce
Sesame oil
Chinese wine wenno tapuy

Sawsawan2:

Naganus a laya, ginadgad iti pino
Tubbog ti lemon wenno kalamansi
Light soy sauce

Sawsawan3:

Bugas ti baraniw, tinadtad
Tubbog ti lemon wenno kalamansi
Light soy sauce

Preparasyon:

Iti dakkel a kaserola, ilambong ti sibubukel a manok iti danum a natimplaan iti asin ken paminta. Ilaok iti paglambongan dagiti sibuyas, laya, bawang ken tarragon wenno cilantro, no agusar. Ipaburek iti 30-45 minutos depende iti kadakkel ti manok wenno aginggana nalukneng. Adawen ken itabsaw iti danum nga adda yelo na tapno insigida a mabaawan ti manok ken agtalinaed ti moisture na.

Gudduaen ken iwa-iwaen iti kalalaingan na a serving sizes. Ikabil iti platter kagiddan ti ensalada a natnateng wenno naiw-iwa a pipino.

Isagana ti sawsawan. Paglalaoken laeng dagiti ramen ti sawsawan a kayatyo nga adda iti ngato. Laokan ti sili no kayat. # nordis.net