Naladaw nga inproseso iti FPIC

Ni DONNA RABANG PETA
www.nordis.net

LAOAG CITY, Ilocos Norte — “Sakbay nga iyaramid ti ania man nga FPIC wenno MOA, nu mabalin kadi ket kasapulan a risuten tayo kuma pay daydi problema nga inaramid ti dati a kumpanya ti NLUPC Asia?” dayta ti imbalikas ni Chieftain Ben Aguinaldo iti naangay a maikadua nga Community Assembly nga insayangkat ti National Commission on Indigenous Peoples (NCIP) idi November 14, 2014 idiay Municipal Beach Resort sadiay Pagudpud, Ilocos Norte.

Ti NLUPC Asia ti kaunaan a kumpanya a nagipatakder kadagiti windmills ken transmission lines iti uneg ti ancestral domain dagiti Yapayao ken nalawag a naglabisng kadagiti pagannurutan dagiti nainsigudan nga umili ken adda dagiti saan da nga impatungpal basar iti immuna a Memorandum of Agreement (MOA) da.

Laksid iti kumpanya nga NLUPC Asia, nagitakder met laeng ti Northern Luzon Renewable Energy Corporation (NLREC) kadagiti turbina ti windmills ken transmission lines iti lugar dagiti IP saan laeng nga iti Caunayan ken Balaoi ili ti Pagudpud nudiket karaman ti lugar ti Payac, Masamoyao ili ti Bangui. Ti NLUPC Asia ken NLREC ket agkadua wenno agkabsat a kumpanya.

Adu dagiti saludsod a saan a masungbatan dagiti staff ti NLREC, nangruna dagiti naglabas nga isyu ken panaglabsing ti kadua da a kumpanya -ti NLUPC Asia. Saan da met laeng a masungbatan a diretso nu manu ti kapital wenno puonan ti negosyo da ken nu manu ti maganansya da iti proyekto a windmills. Saan da met laeng a masungbatan dagiti saludsod nu manu ti benipisyo nga maipaay kadagiti nainsigudan nga umili iti panawen nga ag-operate ti kumpanya.

Basar iti agenda ti miting, iprisinta ti kumpanya no ania ti proyekto da ngem ababa laeng ti presintasyon nga imbingay ni Atty. J.P dela Pasion, legal officer ti NLREC.

Kinuna dagiti nagatendar a ti umno kuma a proseso ket sakbay a nagipatakder da iti uneg ti ancestral domain ket naangay kuma pay ti FPIC ken naamuan da kuma no ania dayta a proyekto, ngem ti kamali ken linabsing unay ti kumpanya ket intakder dan dagiti istruktura sakbay da nga impakaamo kadagiti umili wenno sakbay da a nagisayangkat ti FPIC.

“Ngarud, nalawag a naglabsing kayo… annugoten yo kadi nga adda ti linabsing yo?” ngamin manu a daras a sinaludsod da iti kumpanya ngem saan da a masungbatan, agwingiwing ni Atty. dela Pasion.

Kinuna ti kumpanya nga pudno unay a naladaw ti panangipakaamo da kadagiti IP ngem kas rebbengen da, idalan da latta met ti FPIC ken proseso uray pay naladawen. Innayon da pay nga idi sakbay da nga ipatakder dagiti istruktura ket saan da nga ammo a nadalapus da dagiti ancestral domain iti Yapayao ken uray pay ti panangitudo ti DENR dagiti boundary ket saan met laeng a nalawag.

Nu man pay, adu dagiti saludsod a saan nalawlawagan ken nasungbatan, naidatag iti miting nga iti sumaruno a panagtotongtong da nga ipaayab ti NCIP ket maangay ti consensus wenno panagbibinuutos dagiti IP nu palubusan da nga agtuloy ti operasyon ti kumpanya wenno saan.

Ti NLUPC Asia a partner ti NLREC ket inikkan ti Department of Energy ti award tapno agitakder iti windmills idi June 2013 a mangpartuat iti 81 megawatts iti lugar ti Caparispisan, Pagudpud. Kangrunaan a nangpondo daytoy ket ti AC Energy Holdings Inc. (ACEHI), subsidiaryo ti Ayala Corporation ken ti Philippine Investment Alliance for Infrastructure (PINAI) ken UPC Renewables. # nordis.net