Programa ti NDFP iti karbengan, panangsalaknib dagiti ubbing
2 MIN READ
Ni BRENDA S. DACPANO
www.nordis.net
QUEZON CITY — Pormal nga impablaak ti National Democratic Front of the Philippines ti libro daytoy maipanggep iti karbengan, panangsalaknib ken pagimbagan dagiti ubbing idi Setiembre 10 iti opisina ti NDPF-Joint Secretariat iti Joint Monitoring Committee (JS-JMC) idiay Cubao, Quezon City. Dinar-ayan dagiti nadumaduma nga organisasyon ti ubbing ken karbengan tao.
Ti libro a napauluan ti “NDFP Declaration and Program of Action for the Rights, Protection and Welfare of Children” ket kasilpo ti immuna nga impablaakda idi 2005 maipanggep iti panangsalaknib kadagiti karbengan dagiti ubbing a Pilipino.
Kinuna ni Luis Jalandoni, miembro ti peace panel ti NDFP, “Siam a tawen ti napalabasen idi inreport ti United Nations Special Representative for Children and Armed Conflict Radhika Coomaraswamy nga agrekrekrut kano ti New Peoples Army (NPA) kadagiti ubbing a soldados.” Innayon ni Jalandoni, “Nairot nga ipatpatungpal ti NPA dagiti annuroten ken linteg iti panagsalaknib kadagiti karben-gan dagiti ubbing.” “Daytoy a deklarasyon ti sungbat ti NDFP kadagiti pammabasol ken pammadakes ti GPH iti tignayan,” kinuna ni Jalandoni.
“Daytoy a deklarasyon ti mangpaneknek a ti NDFP ket determinado a mangiwayat ti programa iti panagtignay para iti panangsaknib ken pagimbagan dagiti ubbing segun kadagiti prinsipyo ken pagannurotan, kasta met iti istandard ti internasyunal maipaggep iti ubing a Pilipino,” segun iti libro. Nailanand pay ditoy dagiti baro a datos ken kapadasanda iti napalabas a pito a tawen.
Addaan innem a paset ti baro a deklarasyon: 1) Deklarasyon tapno pasingkedan, salakniban ken itandudo dagiti karbengan ti ubbing; 2) Internasyunal a linteg maipanggep iti panangsalaknib ti ubbing; 3) Dagiti ubbing maipanggep iti civil war; 4) Kritiko iti Optional Protocol maipanggep iti pannakairaman ti ubbing iti armado a risiris ken ti makuna a Paris Principles; 5) Programa iti panagtignay; ken 6) Ti kooperasyon ti NDFP kadagiti ganggannaet ken internasyunal nga entidad maipanggep iti ubbing. # nordis.net
