By SVD PHILIPPINE NORTHERN PROVINCES

Kas akemna a mangiwaragawag ti mensahe ti Ebangelio kadagiti tattao ti Abra, ti Diocesis ti Bangued, a pagserserbian dagiti appo a papadi a Diocesano ken Missioneros nga SVD, saan nga agsarday ti panagsaritana kadagiti pakaseknan a moral, pannakasaluad ti aglawlaw ken pannakalabsing ti kalintegan dagiti tattao ditoy Abra,nangnangruna ti agraira a pammapatay a mapaspasamak iti kabisera ti Bangued.

Ti missionary commitment mi a mangitandudo ti Justice, Peace and Integrity of Creation (JPIC) ket isu ti mangtigtignay kadakami nga SVD iti pannakipasetmi kadagiti umno a gakat ti gobierno ken NGO para ti napardas a pannakasolbar dagiti amin a kita a pannakasalungasing ti kalintegan dagiti tattao a kas iti pammapatay, kinagulib, kinaranggas ken kinakonniber.

Danggayanmi pay dagitoy a pannakipaset mi babaen ti di agressat ken nadayaw a pannakinuman kadagiti tattao a mangsapul kadagiti pamuspusan a mangrisot kadagiti riribuk a pinataud ti kinadangkes babaen iti consultations, meetings, conferences, seminars ken dadduma pay a wagas ti pannakiuman.

Naotobmi a ti kagagapu dagitoy agsasamusam a pammapatay, kinagulib, rinnisiris, panaglabsing ti linteg ken urnos ket isu ti kumapkapsuten wenno mapukpukawen a nakristianoan ken naingimongan a pammateg,kangruan ti kinalinteg. Gapu iti pannakipagrikna ken tarigagay mi a mapasubli dagitoy a pammateg a kas ti kinapudno, wayawaya, kinalinteg ken kappia, agun-unnoy kami:

– kadakayo a kakabsat a bassiten ti panangkailalayo ti sagot a biag isu’t gapuna a laklakaenyo lattan ti manggudas ti biag ta laglagipenyo koma a ni Apo Dios ket intalekna iti tunggal tao ti panangsaluad ti biag a saan a mangkeltay ti biag.

– kadakayo a kakabsat a nakaitalkan ti panangipatungpal ti linteg ta raemen ken salaknibanyo koma ti kalintegan ti tao kabayatan nga us-usisaen, suksukimaten wenno tuntuntonenyo ti pannakalawlawag ti napasamak a kinadamsak.

– kadakayo a kakabsat nga adda iti turay ta dakayo koma ti mangilungalong ti ayat, panagkikinnaawatan, panagtutunos ken kappia imbes a gurangura,rinnisisris ken panagibales, iti kasta ti liderato yo ket epektibo,makaallukoy,makatignay ken maapresiar.

– kadakayo a kakabsat ditoy Abra ta sitatallugod koma a makitimpuyog kadagiti otoridad ti pannakasalaknib ti kalintegan ti tao kabayatan a maipakpakat dagiti gakat a pananggun-od ti kappia, iti kasta maikanawa ti pannakairurumen ti Abra.

Apo San Jose, Esposo ni Apo Sta. Maris, Patron ti Abra Mission ken SVD Philippines Northern Province, Ibabaetmo ti Panagtalinaed ti Kinalinteg ken Kappia ditoy Abra! # nordis.net